Gobierno del Principado de Asturias

Asturias, mucho más cerca

Estás en

Asturias.es Temas Infraestructuras y territorio Registro de planeamiento y gestión urbanística El Gobiernu d'Asturies y el Conceyu d'Uviéu van cooperar pa ...
 

Registro de planeamiento y gestión urbanística

El Gobiernu d'Asturies y el Conceyu d'Uviéu van cooperar pa rematar la ordenación urbanística d'El Cristo-Buenavista esta llexislatura

El presidente, Javier Fernández, y l'alcalde, Wenceslao López, firmen un protocolu d'actuación qu'incluye una fase nueva de participación ciudadana y un concursu internacional d'idees

El Presidente Javier Fernández durante la rueda de prensa

13/04/2016

El Gobiernu d'Asturies y el Conceyu d'Uviéu soscribieron güei un conveniu pa encarar la ordenación urbanística del espaciu lliberáu nos barrios d'El Cristo-Buenavista tres el treslláu del Hospital Universitariu Central d'Asturies (HUCA) a La Cadellada. Dambes alministraciones comprométense a trabayar a comuña y asumen un protocolu qu'incluye una fase nueva de participación y un concursu internacional d'idees. Según el calendariu previsto, el diseñu urbanísticu ha tar rematáu en 34 meses, primero que remate la llexislatura.

El conveniu firmáronlu’l presidente del Principáu, Javier Fernández; l'alcalde d'Uviéu, Wenceslao López, y la conseyera d'Infraestructures, Ordenación del Territoriu y Mediu Ambiente, Belén Fernández. L'espaciu urbanu que se va ordenar ta delimitáu al norte pola cai Fuertes Acevedo, l'avenida de Buenavista y una serie d'edificios residenciales asitiaos ente les víes de Fuertes Acevedo y Emilio Rodríguez Vigil; al sur, pela avenida del Cristo de les Cadenes, y un edificiu residencial en forma de “L”; al este, pola cai Burriana, la parcela ocupada pel centru de salú d'El Cristo y el mesmu edificiu residencial, y a lo último, al oeste, pola cai Julián Clavería.

El protocolu estrema'l procesu en cinco fases: participación ciudadana (8 meses), concursu d'idees (8 meses), encargu y redacción de los documentos urbanísticos y medioambiental (10 meses), tramitación alministrativa y aprobación de los documentos anteriores (8 meses) y execución de les actuaciones. El planiamientu tamién va incluyir una previsión temporal precisa sobre la execución de les propuestes.

El Principáu impulsó la llexislatura pasada un procesu de participación ciudadana. Sicasí, el conveniu prevé abrir otru procesu similar pa recoyer propuestes, que nesti casu va liderar el Conceyu d'Uviéu y que, a partir de les conclusiones de la consulta anterior, va dotar de conteníu a principios como l'apueste pola diversidá d'usos y va dar una respuesta afayadiza a les esixencies d'accesibilidá y la promoción de diseños urbanos exemplarizantes, sofitaos en criterios de sostenibilidá económica, social y ambiental. Amás, les orientaciones resultantes tendrán de primar el calter públicu de l'actuación y evitar cualquier procesu especulativu.

Tres la fase de participación ciudadana va convocase un concursu internacional d'idees que les sos bases van incluyir baremos de puntuación oxetivos pa la selección de les propuestes que van ellaborar profesionales de disciplines rellacionaes col urbanismu. El primer premiu del concursu va llevar apareyáu l'encargu de los documentos urbanísticos y ambientales o otros necesarios pal desenvolvimientu d'esti espaciu. El planiamientu aprobáu va incluyir una previsión temporal precisa sobre la execución de les sos propuestes y un estudiu económicu con detalle suficiente.

A lo llargo del procedimientu, cualesquier de les partes va poder plantegar la conveniencia de que s'implanten antemanadamente usos y actividaes, provisionales o definitivos, nos edificios que se caltengan o nos espacios llibres d'edificación. Primeramente, tendrá de determinase la so viabilidá llegal, técnica y económica, asina como les fontes de financiación.

Dambes alministraciones alcuerden constituyir una comisión de siguimientu paritaria, integrada por trés representantes de caúna d'elles, que va tener capacidá p'adoptar decisiones, validar les fases del procesu, establecer usos y actividaes y interpretar les cláusules. Amás, comprométense a implementar los medios económicos necesarios pa desenvolver les actuaciones que se-yos asignen, de forma que'l Principáu responsabilízase de la convocatoria del concursu d'idees, asina como l'encargu de los instrumentos urbanísticos y medioambientales necesarios pa definir la ordenación futura del ámbitu, mientres el Conceyu executa'l procesu de participación ciudadana, que tendrá de concluyir primero que remate l'añu.

 

    Testu del convenio'l Cristu-Buenavista (pdf: 1 Mb) (n'español)

Información sobre el documento

© Copyright 2006. Gobierno del Principado de Asturias