Gobiernu del Principau d'Asturies

Asturies, muncho más cerca

Tas en

Asturias.es Persones entamadores La Sociedá Rexonal de Promoción financia con 700.000 euros una ...
 

Persones entamadores

La Sociedá Rexonal de Promoción financia con 700.000 euros una instalación pionera en España pa la valorización de metales

La planta, que se va allugar en Carreño y va crear ocho puestos de trabayu en dos años, va favorecer la xestión sostenible de catalizadores escosos resultantes de procesos químicos. Esta operación enmárcase na Estratexa d'Especialización Intelixente Asturies RIS3 y encaxa nel modelu d'economía circular qu'impulsa la Unión Europea. La SRP tamién concedió un préstamu de 150. 000 euros a la inxeniería Dogram, con sede en Llanera, pa facilitar el so crecimientu

14/07/2019

La Sociedá Rexonal de Promoción del Principáu (SRP) financia con 700.000 euros la iniciativa de la empresa AGR Catalyst Recovery (AGRCR) pa instalar en Carreño una planta pionera n'España dedicada a la valorización de metales conteníos en catalizadores escosos resultantes de procesos químicos.

El sofitu de SRP asegura un proyectu global de 2,5 millones y va facilitar la creación de 8 nuevos empleos nos próximos dos años. Les inversiones van dedicase fundamentalmente a l'alquisición d'equipos y sistemes auxiliares.

El concentráu de metales que se va llograr nel procesu va reintroducir nel ciclu de vida de los catalizadores, lo que va contribuyir a una xestión sostenible al evitar el so depósitu nel vertideru. D'esta miente, va amenorgase'l consumu de recursos minerales primarios y tamién l'enerxéticu, según les emisiones de gases d'efectu invernaderu acomuñaos a la estracción de metales.

El proyectu enmárcase na Estratexa d'Especialización Intelixente Asturies RIS3, que plantega ente les sos linies prioritaries l'apueste polos materiales sostenibles. Amás, encaxa nel modelu d'economía circular impulsáu pola Unión Europea p'ameyorar la eficiencia de los recursos y amenorgar la dependencia de les importaciones de materies primes.

El procesu tecnolóxicu de valorización de metales foi desarrolláu por unu de los socios d’AGRCR, la empresa asturiana Aprochim-Getesarp-Rymoil (AGR), dedicada dende 1998 al tratamientu d'aceites y equipos contaminaos con PCB (bifenilos policloraos), un compuestu químicu tóxicu. Esta compañía foi la primera del sector implantada n'España y anguaño ye la de mayor capacidá del país y la segunda d'Europa.

Xunto con AGR, sociu mayoritariu, forma parte de AGRCR la sociedá británica BMJS Investments Limited, constituyida por dos firmes con amplia esperiencia na xestión y tratamientu de catalizadores escosos y na comercialización internacional de metales procedentes de dichos catalizadores.



Sofitu a la inxeniería Dogram

Per otra parte, la SRP concedió un préstamu participativu de 150.000 euros a Dogram Inxeniería de Documentación Tridimensional, col fin d'impulsar el so crecimientu.

Dogram ye una inxeniería especializada en técniques de captura xeométrica y d'apariencia superficial de la realidá física, mesmo que na esplotación virtual d'esos resultaos. La compañía desenvolvió una novedosa metodoloxía propia pa crear modelos tridimensionales con una calidá bien superior a la media del mercáu.

Primeramente centrada na dixitalización tridimensional (3D) del patrimoniu arquitectónicu, arqueolóxicu y museísticu, l'aplicación del so métodu a sectores industriales abrió un importante nichu de mercáu a la empresa pa la midida y control de grandes pieces ya instalaciones. El préstamu de la SRP va facilitar la inversión n'equipos, l'ampliación de la empresa, allugada en Llanera; la implantación d'estándares de calidá y la contratación de personal (7 nuevos empleos en dos años).

El préstamu a Dogram englóbase no fondero de la SRP Crecimiento emprendedores innovadores, dotáu con dos millones y destináu a microempreses y pymes en crecimientu, bien de calter innovador y tecnolóxicu, bien con un productu propiu y diferencial. Dende la puesta en marcha d'esta llinia en 2013, la Sociedá Rexonal de Promoción sofitó 21 iniciatives con 2.600.000 euros que xeneraron una inversión global de 7,5 millones y favorecieron la creación de 155 puestos de trabayu.

 

Información sobre el documento

© Copyright 2006. Gobiernu del Principau d'Asturies