Gobierno del Principado de Asturias

Asturias, mucho más cerca

Estás en

Aniciu L'Axencia de Consumu realiza más de 7.800 inspecciones anuales ...
 

Aniciu

L'Axencia de Consumu realiza más de 7.800 inspecciones anuales en centros alimentarios pa protexer la salú de la población

El Principáu xestionó 203 alertes alimentaries y retiró del mercáu 34 productos nel 2016. El Gobiernu d'Asturies tramitó 463 espedientes sancionadores que supunxeron multes por un importe de 816. 761 euros

De izquierda a derecha, María Luisa Rodríguez, directora del Laboratorio de Salud Pública; Rosa Urdiales, directora de la Agencia de Sanidad Ambiental y Consumo de la Consejería de Sanidad, y José Altolaguirre, jefe del Servicio de Riesgos Ambientales y Alimentarios

17/07/2017

El Gobiernu d'Asturies realizó l'añu pasáu 7.856 visites de control en 7.042 establecimientos rellacionaos cola preparación, distribución y consumu d'alimentos, cola mira de protexer la salú de la población, amenorgar los riesgos y garantizar la seguridá nos mercaos. Esta ye una de les xeres menos conocíes de l'Axencia de Sanidá Ambiental y Consumu (ASAC), que la so memoria anual foi presentada güei pola so directora, Rosa Urdiales.

La memoria de l’ASAC detalla les actuaciones llevaes alantre nel 2016 pa protexer a los consumidores y vixilar los riesgos para la salú pública asociaos al consumu d'alimentos y a la presencia d'axentes físicos, químicos o biolóxicos nel mediu ambiente.

L'axencia cunta con 156 profesionales, de los cuales 88 trabayen nos servicios centrales y otros 68 repartíos nes ocho unidaes territoriales allugaes nes cabeceres de les árees sanitaries. La so actividá distribúyese en cuatro árees: seguridá alimentaria, sanidá ambiental, consumu y Llaboratoriu de Salú Pública.

Nel área de seguridá alimentaria, los controles realizáronse nos establecimientos inscritos nos rexistros que xestiona l’ASAC. El primeru d'ellos ye'l d'empreses alimentaries, nel que s'inscriben los establecimientos minoristes, y que cunta con 8.774 entidaes, lo que supón una medría de cuasi un 13 % al respective del 2015. L'otru, el rexistru xeneral sanitariu d'empreses alimentaries y alimentos d'ámbitu nacional, incluye 2.349 inscritos.

Nesti ámbitu, desenvuélvense los programes de control oficial d'alimentos, basaos en riesgos, qu'incluyen tolos sectores y fases de la cadena, sacante la producción primaria.

Nos 14 mataderos operativos, inspeccionáronse l'añu pasáu 23.452 tonelaes de carne correspondiente a 56.802 pieces de vacunu, 13.586 pequeños rumiantes (oveyes y cabres), 79.997 gochos, 3.968 equinos y 1.856 aves, nueve vegaes más que nel 2015.

Amás, dientro del Plan Nacional d'Investigación de Residuos y de los programes de seguridá química y de seguridá microbiolóxica d'alimentos, recoyéronse y analizaron 621 muestres.

Xestionáronse tamién 203 alertes alimentaries y 1.519 informaciones, y retiráronse del mercáu 574 productos insalubres, sobre manera d'orixe animal. Asina mesmo, tramitáronse 166 denuncies de consumidores rellacionaes cola seguridá alimentaria.

 

Control de riesgos

L’área de sanidá ambiental de l’ASAC encárgase de controlar los riesgos pa la salú. Esti departamentu tien inscritos 185 establecimientos y servicios de biocides, 523 de riesgu de lexonela, 605 centros de bronciáu, 283 piscines d'usu colectivu, 416 suministros y 963 captaciones d'agua, con 1.359 depósitos.

Pa controlar estes instalaciones, lleváronse alantre 161 inspecciones, recoyéronse y analizáronse 760 muestres d'agua pa consumu, realizáronse 169 inspecciones de piscines y estudiáronse 520 muestres. Tamién s'efectuaron 304 inspecciones d'instalaciones de riesgu de lexonela y analizáronse 291 muestres, amás de 235 inspecciones de centros de bronciáu y 35 campamentos de turismu.

El programa de control sanitariu d'agües de bañu dexó evaluar la calidá de 61 zones y analizar 582 amueses. El 95,77 % de los puntos de muestréu foi calificáu como escelente (lo que supón una medría del 15 % al respective del añu anterior).

Tocantes a la vixilancia del cumplimientu de la llei antitabacu, realizáronse 220 inspecciones, sobre manera n'establecimientos hosteleros.

 

Llaboratoriu de Salú Pública y área de consumu

El Llaboratoriu de Salú Pública ye la unidá de referencia pa los distintos programes de control oficial de l’ASAC y realiza la so actividá n'ámbitos rellacionaos cola contaminación hídrica, ambiental, d'alimentos y residuos veterinarios. Nel 2016 procesáronse 3.629 muestres y realizáronse 26.648 análisis.

Nel área específica de consumu, l'exerciciu pasáu atendiéronse 1.918 denuncies, lleváronse alantre 13 campañes de control de mercáu y realizáronse 1.441 inspecciones. Tamién s'executaron 610 arbitraxes, los más d’ellos centraos nel sector de les telecomunicaciones; atendiéronse 2.774 notificaciones de productos inseguros y retiráronse un total de 14.580 (5.000 más que l'añu anterior).

Nes actividaes d'educación pal consumu, desenvueltes al traviés de la rede de centros de formación, participaron en total 16.999 usuarios, lo que supón una medría del 10 % al respective del 2015.

Tocante a los procedimientos sancionadores, tramitáronse 463 espedientes, que traxeron multes por un valor de 816.761 euros. En concreto, 168 casos correspuenden al área de consumu, 193 tán rellacionaos col consumu de tabacu, 101 cola seguridá alimentaria y unu cola sanidá ambiental.

   Icono gráfico alusivo al tipo de archivo Memoria (Pdf: 6 Mb) (n'español)

   Icono gráfico alusivo al tipo de archivo Audio (Audio: 518 Kb) (n'español)

Información sobre el documento

© Copyright 2006. Gobierno del Principado de Asturias