Gobierno del Principado de Asturias

Asturias, mucho más cerca

Estás en

Aniciu Temes Emplegu Empléu Públicu El Principáu pon en marcha un plan gradual pa la vuelta al ...
 

Empléu Públicu

El Principáu pon en marcha un plan gradual pa la vuelta al trabayu presencial de los emplegaos públicos que va durar seis selmanes

El procesu de reincorporación, qu'inclúi midíes de seguridá y equidad, va concluyir antes del 21 de xunu, siempre que la situación sanitaria lo permita. La resolución publícase güei nel Bopa y recueye midíes empobinaes a embrivir riesgos y garantizar l’afayadiza prestación de los servicios

13/05/2020

La Conseyería de Presidencia ellaboró un plan gradual pa la vuelta al trabayu presencial de los emplegaos públicos, qu'inclúi midíes preventives y organizativas empobinaes a reforzar la seguridá del personal, embrivir riesgos y garantizar un serviciu afayadizu a la ciudadanía. Ta previsto que'l procesu s’enllargue seis selmanes, polo que va rematar antes del 21 de xunu, siempre que la situación sanitaria lo permita.

La resolución, que se publica güei nel Boletín Oficial del Principáu (Bopa), incorpora criterios de equidá pa quien tengan qu'atender a menores o persones dependientes afectaes por zarru de centros y pa trabayadores que, pol so estáu de salú o circunstancies particulares, puedan resultar especialmente vulnerables al coronavirus. Estos grupos van ser los postreros en retornar a los sos puestos nes dependencies de l'Alministración autonómica.

Ente les midíes preventives, siguiendo les indicaciones del Serviciu de Prevención de Riesgos Llaborales, va caltenese una distancia mínima de seguridá de dos metros ente persones. Cuando esto nun sía posible, van instalase barreres físiques ente los puestos y van adoptase midíes de flexibilidá llaboral - incluyíos turnos de trabayu y teletrabayu - cola fin d'evitar una concentración escesiva de personal nes conseyeríes y organismos autonómicos.

Amás, l'Alministración va aprovir a la plantiya del material de protección adaptáu en cada casu, incluyíes soluciones hidroalcohóliques, guantes y mázcares, naquellos puestos de trabayu nos que nun se pueda caltener la distancia interpersonal de seguridá encamentada.

Nos servicios d'atención presencial a la ciudadanía, como los rexistros, va implantase un sistema de cita previa y van disponese barreres protectores. Coles mesmes, va ampliase l'horariu d'apertura y atención.

Tamién se va fomentar la dixitalización y l'usu de documentos electrónicos, sobremanera nes oficines de rexistru; va dase prioridá a les xuntes telemátiques, y van suspendese los viaxes de trabayu que puedan arreglase telefónicamente o por aciu videoconferencia.



Midíes d'organización

Tocantes a les acciones organizativas, el personal va incorporase por rioles, d'acordies coles fases de desescalada regulaes pol Gobiernu d'España. D'esta miente, primero van incorporase a les sos places les persones qu'ocupen xefatures y les que son responsables de procesos; darréu, aquelles que nun tienen la opción de teletrabayar y, d'últimes el restu de personal, bien de forma presencial o a distancia.

Al marxe de los profesionales encargaos de los servicios esenciales, les primeres incorporaciones van empezar a partir de mañana, 14 de mayu, tres la publicación de la resolución correspondiente nel Bopa.

D'estes instrucciones queden escluyíos el personal docente, el de l'Alministración de Xusticia y el del Serviciu de Salú del Principáu (Sespa).

Información sobre el documento

© Copyright 2006. Gobierno del Principado de Asturias