Gobiernu del Principau d'Asturies

Asturies, muncho más cerca

Tas en

Asturias.es Temes Pesca El Gobiernu d’Asturies anueva pa diez años el conveniu pa la ...
 

Pesca

El Gobiernu d’Asturies anueva pa diez años el conveniu pa la meyora de la navegación de les ríes del Eo y Navia

El conseyeru d’Empléu firmó güei la prórroga del alcuerdu con representantes de la empresa Draga Ría de Navia. La llimpieza de dambos estuarios facilita’l trabayu de los astilleros del occidente y el caltenimientu de l’actividá económica y del empléu na zona

19/06/2019

El Gobiernu d’Asturies anovó pa un periodu de diez años la concesión de los trabayos de llimpieza y meyora de les canales de navegación de les ríes del Eo y Navia a l’agrupación d’interés económicu Draga Ría de Navia. La prórroga d’esti conveniu va entrar en vigor a partir del 21 d’ochobre.

El conseyeru d’Empléu, Industria y Turismu, Isaac Pola, que firmó güei l’alcuerdu colos representantes de la empresa, destacó l’interés del Principáu por “garantizar les condiciones de seguranza na navegación en puertos autonómicos; ente ellos, los d’As Figueiras y Navia, nos que prevalez l’acción mareal sobre la fluvial”. “Esti oxetivu resulta d’importancia vital pal desenvolvimientu y la viabilidá del sector naval, básicu na industria asturiana, polo que ye imprescindible dafechu adecuar les ríes dragándoles”, añedió.

La concesión foi aprobada en setiembre del 2009 con una vixencia de diez años, polo que, a puntu de rematar, Draga Ría de Navia solicitó la renovación pa otru periodu d’una década. El Conseyu de Gobiernu aprobó la prórroga del conveniu al considerar que se caltienen les razones d’interés públicu que motivaron la firma y que la evolución natural de les ríes, la so dinámica mareal y litoral, amás de les sos necesidaes de dragáu, siguen riquiendo d’esta intervención.

Los trabayos de dragáu en dambes ríes aseguren que los astilleros de la ribera puedan asumir la construcción d’embarcaciones de más caláu, lo que facilita’l caltenimientu del empléu na zona, ún de los mayores motores económicos del occidente asturianu.

 

Información sobre el documento

© Copyright 2006. Gobiernu del Principau d'Asturies