Gobierno del Principado de Asturias

Asturias, mucho más cerca

Estás en

Aniciu Temes Investigación Asturies despunta nel mapa de tresferencia de conocimientu ...
 

Investigación

Asturies despunta nel mapa de tresferencia de conocimientu científicu a la sociedad

El Principáu ye la tercer comunidá col porcentaxe más altu d'investigadores que la so actividá tien impactu na economía y na redolada territorial. El Ministeriu d'Universidaes reconoció'l llabor de 210 miembros de la comunidá investigadora asturiana. La Conseyería de Ciencia considera que'l programa ye un estímulu pal profesoráu universitariu y el personal científicu d'organismos públicos

21/06/2020

Asturies ye la tercer comunidá con mayor porcentaxe d'investigadores que realicen tresferencia de conocimientu ya innovación a la sociedá. El denomináu sexeniu de tresferencia, qu'evalúa l'impactu que xenera'l personal científicu na economía y na redolada territorial, asitia al Principáu seis puntos percima de la media nacional, solo per detrás de Cataluña y Cantabria.

L'Axencia Nacional d'Evaluación de la Calidá y Acreditación (Aneca) punxo en marcha per primer vegada un sistema pa midir cuál ye'l nivel de tresferencia de conocimientu y conceder al profesoráu universitariu y a los investigadores d'organismos públicos un reconocimientu por periodos de seis años, equivalente al tradicional sexeniu d'investigación.

El sexeniu de tresferencia ye una acreditación que puede llograr cada profesor o investigador pol so trabayu en relación cola so redolada territorial. Trátase d'una parte más del currículum profesional. D'un llau ta la evaluación y reconocimientu de la docencia; d'otra, la evaluación de la investigación (sexenios d'investigación), y agora súmase, la evaluación de la contribución al desarrollu territorial y a la sociedá (sexenios de tresferencia: un tramu cada seis años).

N'Asturies, llograron la evaluación positiva 210 de los 433 investigadores presentaos, lo que supón una tasa d'éxsitu del 48,50%, solo superada por Cataluña (54,20) y Cantabria (51,85%). Les cifres revelen que bona parte del personal investigador na rexón contribúi viviegamente a treslladar la so esperiencia y conocencia a la sociedá.

Esta tresferencia mídese y traduzse en xeneración de valor económicu al traviés de patentes; rexistros de software; participación en contratos y proyectos con empreses y otres instituciones, o pertenencia a spinoffs. Tamién por mediu del fomentu de la formación y la cultura entamadora; la collaboración con instituciones, y la xeneración de valor social, como convenios o contratos con entidaes ensin ánimu d'arriquecimientu o alministraciones públiques, llibros, capítulos de llibros o artículos y actividaes d'espardimientu de la investigación en medios de comunicación audiovisual.

Con daqué más de 3.000 persones contrataes n'investigación a tiempu completu, la ciencia asturiana tamién ocupa la tercer posición si midimos el númberu de sexenios de tresferencia concedíos per cada mil investigadores (64/1000), solo superada nesti casu por Cantabria y Castiella-La Mancha, y bien per delantre de comunidaes como País Vascu, onde rexistren una tasa de daqué más de 11 sexenios de tresferencia por cada mil científicos.

La directora xeneral d'Universidá, Cristina González, considera mui importante esti programa pilotu que supón “un estímulu” pa que la comunidá científica “vea reconocíu’l so llabor de tresferencia de conocimientu a la sociedá, amás de la investigadora”. Estos resultaos, asegura González, evidencien que “Asturies ye una rexón con una presencia bien notable na tresferencia de conocimientu” en toles árees de conocimientu, tanto científiques como humanístiques. Dende la ANECA treslladóse a les comunidaes autónomes la decisión de caltener la convocatoria non solo pa 2020 sinón tamién p'años socesivos.

L’Aneca examinó 16.151 espedientes, de los que resultaron positivos el 42,47% (lo que supón 6.859) y negativos el 57,53 % (que correspuende a 9.292 solicitúes). Con estos sexenios, el Ministeriu d'Universidaes pretende reconocer les relaciones de los profesores ya investigadores cola redolada. La so intención ye esplotar el potencial intelectual, científicu, tecnolóxicu y promover la tresmisión del so saber a la sociedá.

La fienda de xéneru na tresferencia de conocencia tamién sobresal nesta primer evaluación. Nel casu d'Asturies, onde'l 92% de los sexenios concéntrase na Universidá d'Uviéu, solo trés de cada diez solicitúes pertenecen a muyeres.


Icono gráfico alusivo al tipo de archivo Audiu (Audiu: 412 Kb) (n'español)

Información sobre el documento

© Copyright 2006. Gobierno del Principado de Asturias