Gobiernu del Principau d'Asturies

Asturies, muncho más cerca

Tas en

Asturias.es El Principáu ufierta al Gobiernu central tola so esperiencia y ...
 

Aniciu

El Principáu ufierta al Gobiernu central tola so esperiencia y collaboración institucional pa facer frente al retu demográficu

- El conseyeru de Presidencia presenta a la comisionada estatal, Edelmira Barreiro, na so segunda reunión d’anguaño, toles iniciatives impulsaes dende Asturies

13/11/2017

   - El plan aprobáu pol Executivu autonómicu va movilizar más de 2.200 millones hasta’l 2027 pa revertir la pérdiga de población

El conseyeru de Presidencia y Participación Ciudadana, Guillermo Martínez, presentó güei a la comisionada estatal frente al retu demográficu, Edelmira Barreiro, el Plan Demográficu del Principáu, que va movilizar 2.200 millones na década viniente, y ufiertó al Gobiernu central llealtá institucional y tola esperiencia d’Asturies pa trabayar a comuña nesti ámbitu.

Na segunda reunión que tien cola comisionada dende primeros d’añu, Martínez esplicó los pormenores d’esti documentu, que va xirar alredor de siete exes d’actuación cola mira de revertir un enclín marcáu pola perda d’habitantes, l’avieyamientu y la despoblación de los núcleos rurales. El conseyeru sorrayó que la estratexa rexonal da prioridá a la dinamización económica y la igualdá d’oportunidaes, qu’absuerben el 61 % del presupuestu con camín de los 1.400 millones d’inversión.

“Queremos treslladar el nuestru compromisu col trabayu que ta desenvolviendo l’equipu de la comisionada y que pela primer vez asitia’l retu demográficu como prioridá na axenda política”, apuntó’l titular de Presidencia.

De la mesma manera, repitió la voluntá d’Asturies de cooperar nel desenvolvimientu de la estratexa nacional, ún de los alcuerdos derivaos de la Conferencia de Presidentes celebrada en xineru, tres del pidimientu de les ocho comunidaes autónomes que formen parte del Foru de Rexones con Desafíos Demográficos (FREDD), onde participa’l Principáu.

Los últimos datos rexistraos n’Asturies amuesen la necesidá d’encarar la situación actual con una estratexa integral. Según les cifres de Sadei, el númberu de fallecimientos nel tercer trimestre d’anguaño (2.880) volvió superar al de nacencies (1.564), lo que se traduz nuna perda de población por causes vexetatives de 1.316 habitantes nesi periodu. Con esti últimu análisis, la cifra de fallecimientos en comparanza coles nacencies da un saldu negativu de 5.258 persones de xineru a setiembre.

Pa facer frente a esti problema, el Gobiernu d’Asturies desenvuelve dende la llexislatura pasada delles acciones que se van reforzar nel exerciciu que vien, pal que se prevé un gastu dientro del plan demográficu de 226 millones.

L’afitamientu de los servicios asistenciales, el fomentu de la innovación vinculada al avieyamientu activu y la puesta en marcha de midíes empobinaes al reemplazu xeneracional suponen un apartáu relevante de la estratexa.

Martínez enfotóse en que’l documentu aprobáu pol Executivu autonómicu recueya un alcuerdu ampliu ente les formaciones polítiques con representación parllamentaria y el consensu social poles organizaciones empresariales, sindicales y entidaes vinculaes al movimientu asociativu.

 

 

Información sobre el documento

© Copyright 2006. Gobiernu del Principau d'Asturies