Gobiernu del Principau d'Asturies

Asturies, muncho más cerca

Tas en

Asturias.es Temes Vivienda El modelu asturianu de Housing first, escoyíu como bona práctica ...
 

Vivienda

El modelu asturianu de Housing first, escoyíu como bona práctica pol Observatoriu Européu de Vivienda

Un informe destaca l’actuación del Principáu xunto a les de países como Finlandia, Irlanda, Bélxica y Austria. Asturies punxo a disposición 30 viviendes que dan agospedamientu a 31 persones n’Uviéu, Xixón, Avilés y el Franco

28/06/2019

L’Observatoriu Européu de la Vivienda escoyó’l modelu asturianu de Housing first como una de les bones práctiques que se tán desenvolviendo anguaño nel continente pa favorecer que la vivienda se convierta nun instrumentu d’inclusión social.

Asina lo recueye un informe ellaboráu por esti organismu, dependiente de Housing Europe, onde s’analiza la implantación del modelu n’Europa y destaca la iniciativa asturiana al llau de la de países como Finlandia, Irlanda, Bélxica y Austria. El trabayu enmárcase dientro d’una investigación sobre les formes nes que los provisores de vivienda pública encaren los desafíos sociales clave de los nuestros tiempos.

Housing Europe ye la Federación Europea de Vivienda Pública, Cooperativa y Social, qu’axunta 45 federaciones nacionales y rexonales, incluyida l’Asociación Española de Xestores Públicos de Vivienda y Suelu (AVS), de la que forma parte la empresa pública asturiana, Vipasa. La rede ta compuesta por 43.000 empreses del sector de 24 países, qu’alministren más de 26 millones de viviendes, aproximao’l 11 % de les qu’existen en toa Europa.

El modelu Housing first ye una propuesta innovadora na atención a persones ensin casa, que convierte la vivienda nun elementu prioritariu nel procesu d’inclusión. Asina, amás del accesu a ella, artículase’l sofitu d’un equipu técnicu que promueve meyores sustanciales na situación personal y social de los usuarios.

Nel Principáu, la metodoloxía Housing first implantóse nesta llexislatura nes trés grandes ciudaes -Uviéu, Xixón y Avilés-, que son los llugares onde más se rexistra la existencia de persones ensin casa. Aparte, el proyectu llegó al conceyu d’El Franco.



Una trentena de viviendes

Nel marcu d’esti programa, l’Executivu autonómicu punxo a disposición 30 viviendes públiques onde se da atención a 31 persones y la so implantación da yá cobertura na zona central d’Asturies al 40 % del colectivu diana al que se dirixe’l programa.

La iniciativa busca facilitar l’autonomía de los participantes, como reflexa’l fechu de que los beneficiarios soscriben un contratu d’arriendu y pasen a vivir en viviendes públiques, con tolos derechos y obligaciones de los renteros habituales. La iniciativa desenvuélvese en collaboración colos conceyos, que son los que contraten les entidaes que realicen el trabayu d’acompañamientu.

Destaca la implantación pionera del programa na zona rural, nel Franco, onde la implicación de l’alministración local, autonómica y de la mesma comunidá nel programa fixo posible que dos persones accedan de forma estable a un espaciu normalizáu de convivencia. La iniciativa foi gallardonada anguaño nel II Concursu de Bones Práctiques en Materia de Vivienda del Principáu d’Asturies.

 

Información sobre el documento

© Copyright 2006. Gobiernu del Principau d'Asturies