Gobiernu del Principau d'Asturies

Asturies, muncho más cerca

Tas en

Asturias.es El Principáu define los sectores estratéxicos prioritarios pa ...
 

Aniciu

El Principáu define los sectores estratéxicos prioritarios pa captar más fondos europeos d’investigación, desenvolvimientu y innovación

El Gobiernu d’Asturies reunió güei a representantes de más d’una ventena d’instituciones, empreses, organismos y centros tecnolóxicos pa evaluar propuestes. El conseyeru de Ciencia enfótase en que se puedan presentar polo menos 12 proyectos por caún de los dos retos científicos que s’escueyan

Un momento de la reunión

09/10/2019

La Conseyería de Ciencia, Innovación y Universidá va movilizar los sectores vinculaos a la investigación y el texíu empresarial de la comunidá pa optar al máximu de proyectos europeos posible nos años vinientes. El puntu de partida pa definir los ámbitos estratéxicos a los que se va aplicar la I+D+i rexonal empezó güei cola xunta de los grupos de trabayu -integraos por más d’una ventena d’instituciones, axentes científicos y empreses- que se van encargar d’evaluar y decidir, primero de final d’añu, qué dos grandes retos en materia d’investigación y innovación pue afrontar Asturies de cara al 2030 y qué clas de proyectos van tener prioridá.

Les propuestes que s’impulsen van dar cobertura a tol ecosistema científicu y empresarial, con atención especial a pymes y a empreses con capacidá tractora nel ámbitu de la innovación. El conseyeru Borja Sánchez señaló qu’ún de los dos retos científicos (o misiones) va tener como epicentru la economía circular, la transición enerxética y la sostenibilidá, mentes que l’otru va concentrar les acciones en biomedicina, biotecnoloxía y alimentación, incluyendo l’agua dulce. Les tecnoloxíes de la información y la comunicación van incorporase tamién como elementos tresversales.

Los grupos de trabayu que van decidir les llinies de proyectos pa competir n’Europa tán formaos por representantes de les conseyeríes d’Infraestructures, Facienda, Presidencia y Desenvolvimientu Rural, ente otros departamentos de l’Alministración; la Universidá d’Uviéu, los organismos d’investigación, los centros tecnolóxicos y el sector empresarial.

Nesta primer xunta participaron más de cuarenta persones en representación de la Universidá d’Uviéu, el Conseyu Superior d’Investigaciones Científiques (CSIC), Idepa, Ficyt, Finba, Serida, Idonial, Cetemas, Asincar, CTIC, Fundación de Investigación Oftalmológica Fernández-Vega, Fade, Hunosa, ThyssenKrupp, Capsa, Dropsens y Asturhealth, ente otres. Nuna segunda fase van incorporase más axentes sociales y empresariales.

Na sesión, realizóse una puesta de mancomún d’idees y distribuyéronse los grupos de trabayu. L’oxetivu ye que primero que remate l’añu se determine tanto la estratexa concreta de cada misión como los proyectos nos que va poder trabayase.

El titular de Ciencia enfotóse en qu’Asturies pueda intentar competir n’Europa polo menos con una docena de propuestes concretes en caúna de les misiones, que repercutan directamente na meyora de la comunidá autónoma.

El programa de Misiones d’Investigación y Innovación de la Comisión Europea enmárcase nel Horizonte Europa 2021-2027 y cunta con más de 90.000 millones pa financiar proyectos. El propósitu xeneral ye focalizar la investigación, la innovación y les inversiones escontra la resolución de problemes de la economía y la sociedá d’Asturies, amás d’estimular la medría, l’emplegu y la collaboración público-privada ente dellos sectores.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies