Gobiernu del Principau d'Asturies

Asturies, muncho más cerca

Tas en

Asturias.es Temes Consumu L’Axencia de Consumu realiza más de 8.500 inspecciones anuales ...
 

Consumu

L’Axencia de Consumu realiza más de 8.500 inspecciones anuales en centros alimentarios pa protexer la salú de la población

El conseyeru de Sanidá presentó güei la memoria d’actividaes del 2018 d’esti organismu, pola mor de la celebración del Día Mundial de la Seguranza Alimentaria. El Principáu xestionó 250 alertes y retiró del mercáu 48 productos l’añu pasáu. Tamién tramitó 575 espedientes sancionadores que supunxeron multes por un importe de 703. 800 euros

07/06/2019

El Gobiernu d’Asturies realizó 8.570 visites de control en 7.738 establecimientos rellacionaos cola preparación, distribución y consumu d’alimentos nel 2018, cola mira de protexer la salú de la población, menguar los riesgos y garantizar la seguranza nos mercaos. Estos son dalgunos de los datos recoyíos na memoria anual de l’Axencia de Sanidá Ambiental y Consumu (Asac) que presentó güei’l conseyeru de Sanidá, Francisco del Busto, xunto a la directora del organismu, Rosa Urdiales.

La presentación de la memoria coincide cola celebración, pela primer vez, del Día Mundial de la Seguranza Alimentaria, una efeméride aprobada pola asamblea xeneral de les Naciones Uníes nel mes d’avientu pasáu coles mires de sensibilizar a la población sobre la importancia del control alimentariu pa reducir enfermedaes.

La memoria de l’ASAC detalla les actuaciones llevaes a cabu pa protexer a los consumidores y vixilar los riesgos pa la salú pública asociaos al consumu d’alimentos y a la presencia d’axentes físicos, químicos o biolóxicos nel mediu ambiente.

Nel área de seguranza alimentaria, destaca l’aprobación del II Plan coordináu de control de la cadena alimentaria del Principáu 2018-2020, onde participaron, amás de l’axencia, les direcciones xenerales de Ganadería, Pesca Marítima y Desenvolvimientu Rural y Agroganadería. Esti documentu ufierta un enfoque integral ‘del campu a la mesa’ qu’incluye tolos programes de control oficial basaos en riesgos d’alimentos, amás de los correspondientes a la producción primaria.

Los controles fáense nos establecimientos inscritos nos rexistros que xestiona l’Asac: el de minoristes, que cunta con 11.044 establecimientos, 1.242 más que l’añu anterior, y el rexistru xeneral sanitariu d’empreses alimentaries y alimentos d’ámbitu nacional, qu’incluye 2.570 inscritos, 317 más que nel 2017.

Amás, nos 15 mataderos operativos n’Asturies inspeccionáronse l’añu pasáu 25.617 tonelaes de carne, un 15 % más que l’anterior, correspondientes a 57.500 pieces de vacunu, 12.700 rumiantes pequeños (oveyes y cabres), 50.140 gochos, 2.723 equinos y 3.104 aves. Amás, nel marcu del Plan Nacional d’Investigación de Residuos y de los programes de seguranza química y de seguranza microbiolóxica recoyéronse y analizáronse 588 muestres.

Tamién se xestionaron 250 alertes alimentarias y 521 informaciones; retiráronse del mercáu 48 productos insalubres, fundamentalmente d’orixe animal, y tramitáronse 206 denuncies de consumidores rellacionaes cola seguranza de los alimentos.



Control de riesgos

L’área de sanidá ambiental de l’Asac vixila los riesgos pa la salú y xestiona los rexistros d’actividaes y establecimientos a inspeccionar. Esti departamentu tien inscritos 86 establecimientos y servicios de biocides, 304 instalaciones de riesgu de lexonela, 513 centros de bronciáu, 436 piscines d’usu públicu, 401 suministros y 979 captaciones d’agua, con 1.388 depósitos y 66 estaciones de tratamientu.

Pal so control, lleváronse a cabu 186 inspecciones, lo que supunxo analizar 851 muestres d’agua destinaes al consumu, realizáronse 231 inspecciones en piscines y evaluáronse 488 muestres. Tamién s’efectuaron 649 controles n’instalaciones de riesgu de lexonela y recoyéronse 310 muestres. Amás, executáronse 196 inspecciones en centros de bronciáu, 34 n’establecimientos y servicios de biocides y 47 en campamentos turísticos.

Dientro del programa de control sanitariu d’agua de bañu evaluóse la calidá de 62 zones y analizáronse 632 muestres. La calificación llograda foi escelente nel 76,39 % de los casos.

Tocante a la vixilancia del cumplimientu de la llei antitabacu, realizáronse 308 inspecciones, básicamente n’establecimientos hosteleros.



Llaboratoriu de Salú Pública y área de consumu

El Llaboratoriu de Salú Pública, que realiza l’actividá n’ámbitos rellacionaos cola contaminación hídrica, ambiental, d’alimentos y residuos veterinarios, procesó l’añu pasáu 4.042 muestres y efectuó 27.399 análisis. Tamién collaboró, el segundu añu siguíu, col Hospital Universitariu Central d’Asturies (HUCA) pa garantizar la seguranza de los alimentos que s’ufierten a los pacientes ingresaos, pa lo que se realizaron 679 analítiques.

Nel área de consumu, atendiéronse 2.516 denuncies, lleváronse a cabu 12 campañes de control de mercáu y 2.543 inspecciones. Tamién s’executaron 489 arbitraxes, la mayoría rellacionaos col sector de les telecomunicaciones (71,5 %); xestionáronse 3.004 notificaciones de productos inseguros y retiráronse 121.380.

Tocante a los procedimientos sancionadores, tramitáronse 575 espedientes, que supunxeron multes por un valor de 703.800 euros. En concreto, 195 espedientes correspuenden al área de consumu, 226 tán rellacionaos col usu del tabacu, 153 cola seguranza alimentaria y ún cola sanidá ambiental.

La memoria pue consultase nesti enllaz:

https://tematico8.asturias.es/seguridadAlimentaria/actividadesProgramas/

 

   Icono gráfico alusivo al tipo de archivo Memoria ASAC (Pdf: 2 Mb) (n'español)
   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies