Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies refuerza'l programa pa persones ensin ...
 

Aniciu

El Gobiernu d'Asturies refuerza'l programa pa persones ensin llar con dos viviendes más y llogra dar respuesta yá a 32 ciudadanos

El grupu d’acción social creáu nel estáu d’alarma consigue reducir nun 25% las pernoctes a la intemperie

26/10/2020

El Gobiernu d'Asturies va apurrir nes próximes selmanes dos viviendes a persones ensin llar dientro del programa Housing first, que dende la so puesta en marcha n'Asturies, n'avientu de 2016, llogró cubrir les necesidaes de 32 transeúntes.

Amás, como conclusión al trabayu desenvueltu pol grupu d'acción social nel estáu d'alarma, el Principáu, a propuesta de los servicios sociales municipales, apurrió 30 viviendes a otres tantes persones que s'agospiaben en dispositivos d'emerxencia (bien aquellos habilitaos nel estáu d'alarma o bien albergues locales pa transeúntes).

“Siguimos trabayando pa dar solución a les persones que precisen un llar n'Asturies. El nuestru oxetivu ye evitar que se duerma albentestate y, según los datos facilitaos polos conceyos, tamos amenorgando ca día la cifra. Ello ye que dende l'estáu d'alarma amenorgóse en casi una cuarta parte”, esplicó'l director xeneral de Vivienda, Fermín Bravo.

El Gobiernu d'Asturies punxo en marcha va dos años un proyectu innovador que facilita l'accesu a la vivienda a persones que salen de prisión en llibertá definitiva y nun disponen de rede de sofitu social o familiar. Esta midida de prevención del ensinllarismu yá facilitó un llar a dos exreclusos y nes próximes selmanes va facese entrega d'otra vivienda más, faciendo coincidir la fecha d'entrega cola puesta en llibertá definitiva de la persona que va habitar l'inmueble.

“Güei que se celebra'l Día Mundial de les Persones ensin Llar ye importante recordar que siguimos firmes nel compromisu nuestru de dotar d'una vivienda a les persones que nun tuvieron hasta agora la oportunidá d'aportar a una”, destacó Bravo.



Un exemplu européu

El modelu asturianu de Housing first foi escoyíu pol Observatoriu Européu de la Vivienda como una de les bones práctiques que se tán desenvolviendo anguaño n'Europa pa favorecer la inclusión social. Asina lo recueye un informe ellaboráu por esti organismu nel que s'analiza la implantación d'un modelu d'intervención n'Europa y destácase la iniciativa asturiana xunto coles de países como Finlandia, Irlanda, Bélxica y Austria.

El modelu Housing first busca facilitar l'autonomía de les persones beneficiaries d'estes viviendes públiques, que suscriben un contratu d'arriendu colos mesmos derechos y obligaciones que los renteros habituales. La peculiaridá d'esti proyectu ye que convierte la vivienda nun elementu prioritariu nel procesu d'adaptación escontra una vida normalizada en sociedá. Por esta razón, amás del accesu a les viviendes, los beneficiarios cunten col sofitu d'un equipu técnicu encargáu de promover la so autonomía personal y que-yos ufierta asistencia psicolóxica.


Icono gráfico alusivo al tipo de archivo Audiu (Audiu: 662 Kb) (n'español)

Información sobre el documento

© Copyright 2006. Gobiernu del Principau d'Asturies