Gobiernu del Principau d'Asturies

Asturies, muncho más cerca

Tas en

Asturias.es Visitar Asturies Qué visitar Los productos artesanos, el deporte y la cultura tradicional van ...
 

Qué visitar

Los productos artesanos, el deporte y la cultura tradicional van ser los protagonistes del Día d’Asturias en Colunga

El programa que se va desarrollar el llunes 7 y el martes 8 complétase con teatru, pasacais y actividaes infantiles . La organización ufierta autobuses llanzadera con serviciu siguíu ente Colunga capital-playa de la Griega-Muséu del Xurásicu d'Asturies-Llastres

02/09/2015

El conceyu de Colunga acueye esti añu los actos conmemorativos del Día d'Asturies, que se van desarrollar na tarde del llunes 7 y la xornada del martes 8 de setiembre. El viceconseyeru de Cultura y Deporte, Alejandro Calvo, y l'alcalde de la localidá, Rogelio Pando, presentaron güei el programa d'actividaes, nel que más d'una ventena d'axentes sociales y culturales de tola comunidá van ufiertar un ampliu y variáu programa, que va tener como exa los productos asturianos, el deporte y la cultura tradicional.

Les actividaes van empezar el llunes a les 17:00 hores cola apertura del mercáu tradicional y la feria de productos artesanos, que se va allugar na plaza del Monumentu, cai Doctor Grande Covián y la redolada de la plaza d’Abastos, onde tamién se va instalar la I Feria del Comerciu. Los visitantes van poder participar na degustación de productos que van ufiertar la Corporación Alimentaria Peñasanta y Sidra Crespo, amás d'asistir al Concursu d'Echadores, prueba puntuable pal campeonatu oficial d'Asturies. El llunes, les mascotes del Muséu del Xurásicu d'Asturies (MUXA) van visitar el mercáu y van emprestase a retratase con tolos que-y lo soliciten.

El Día d'Asturies conviértese un añu más nun escaparate pa mostrar los deportes tradicionales de la rexón. Asina, los asistentes van esfrutar d'exhibiciones en dambes xornaes na Escuela de Deporte Tradicional, allugada nel Parque Hernán Pérez Cubillas. La Federación de Deportes de Minusválidos Físicos del Principáu d'Asturies (FEDEMA) va ufiertar una muestra de deporte adaptáu na sede del centru.

La música va ocupar un llugar destacáu con conciertos y recitales. Los estilos van dende la tonada al rock asturianu. El llunes, los Xardinos Tomás Montoto van acoyer un recital de tonada (18:30 hores) que va dar pasu a los conciertos, na Avenida del Sueve, de Danny Daniel (21:00 hores) y d'Alberto&García (23:00 hores).

La música tradicional va abrir la ufierta musical del martes con una muestra de folclor asturianu, pasacais y actuaciones en dellos puntos de la villa dende les 14:30 hores. A les 16:30 hores, la tonada va tornar a los Xardinos Tomás Montoto onde, a les 19:30 hores, tamién va actuar el coru marineru Manín de Llastres.

Los conciertos del día n'avenida del Sueve van protagonizalos Xuacu Amieva (20:30 hores) y el grupu Bono (22:00 hores).

El teatru tampoco va faltar na programación del Día d'Asturies en Colunga. La compañía de teatru profesional asturiana Hixénicu Papel va llevar a les cais de la localidá'l so espectáculu Entre dinosaurios, que'l públicu va poder esfrutar el martes a les 14:00 y 18:00 hores nos Xardinos Tomás Montoto.

 

Actividaes infantiles

El llunes pela tarde, los más neños van poder esfrutar de los inchables que se van instalar nel Parque Hernán Pérez Cubillas y que'l martes van tar asitiaos nos xardinos del Muséu del Xurásicu d'Asturies.

El MUXA programa esi mesmu día microtalleres xurásicos gratis pa neños de 4 a 12 años, nos que los participantes van poder realizar les sos propies Recuerdos de dinosauriu o descubrir en familia la costa de los dinosaurios. Amás, en collaboración con Xata Asturiana, ufierta a los más pequenos la posibilidá de participar nos talleres infantiles Cocinando ente dinosaurios con xata asturiana.

Tamién, dende les 11:30 a les 14:30 hores, va emitir de forma siguida nel auditoriu del muséu la película infantil Gea y los fósiles, y nel xardín del MUXA van instalase dellos hinchables.

 

Actividaes complementaries

Los participantes nes actividaes del Día d'Asturies van poder esfrutar el martes d'accesu gratis a la esposición permanente del MUXA y a la muestra temporal Meteoritos, la estinción de los dinosaurios.

Amás, el Centru d'Interpretación de la Sierra del Sueve, en Gobiendes, va realizar una xornada de puertes abiertes el llunes y el martes.

Na Casa de Cultura de Colunga va poder visitase, hasta'l 22 de setiembre, la esposición de fotografía antigua Recuerdos y el martes, na localidá de Güerres, va celebrase'l V Rosariu en Vespa y Lambretta.

 

Autobuses llanzadera

Pa facilitar l'asistencia del públicu a los eventos programaos, la organización dispunxo dellos autobuses llanzadera, con serviciu de siguío, ente Colunga capital- playa de la Griega-Muséu del Xurásicu d'Asturies-Llastres, disponibles dende'l llunes dende les 16:30 hores y el martes dende les 10:30 hores.

Información sobre el documento

© Copyright 2006. Gobiernu del Principau d'Asturies