Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies destina 3,8 millones a la primer ...
 

Aniciu

El Gobiernu d'Asturies destina 3,8 millones a la primer instalación de 155 nuevos llabradores y otros 5,6 a 174 proyectos de modernización d'esplotaciones ganaderes

Desarrollo Rural concedió esti añu casi 150. 000 euros pa conservar la raza Asturiana de la Montaña. La prevalencia de la tuberculosis bovina nel Principáu sitúase 29 veces per debaxo de la media nacional

13/05/2018

La Conseyería de Desarrollo Rural y Recursos Naturales va destinar 3.875.000 euros al sofitu a la primer instalación de 155 nuevos llabradores. Tamién va dedicar otros 5.579.693 euros a 174 proyectos de modernización d'esplotaciones, que van xenerar una inversión de 11,7 millones. El resultáu d'esta convocatoria, con un montante de 9,4 millones, va ser publicáu nel Boletín Oficial del Principáu (BOPA) nos próximos díes.

La conseyera de Desarrollu Rural, María Jesús Álvarez, facilitó güei estos datos en Cangues d'Onís na clausura del 31 Concursu y Puya de la Raza Asturiana del Monte. Con estes ayudes, recoyíes nel Programa de Desarrollu Rural d'Asturies (PDR) 2014-2020, búscase ameyorar el rendimientu económicu de les esplotaciones por aciu un usu más afayadizu de los preseos de producción, favorecer la innovación y les nueves tecnoloxíes, y facilitar l'accesu de los mozos al empléu nel mediu rural. “Esti esfuerzu económicu demuestra'l compromisu del Principáu col fomentu del relevu xeneracional y la meyora de la competitividá de les esplotaciones agrícoles y ganaderes pa garantizar la supervivencia del sector y contribuyir al caltenimientu del equilibriu territorial”, aseguró.

Álvarez recordó que'l próximu añu va doblase l'importe de les ayudes individuales pa la incorporación de moces, que va xubir de 25.000 a 50.000 euros. Esi aumentu va producise tres el cambéu del PDR, que va reorientar el gastu financieru de 57 millones del Fondu Européu Agrícola de Desarrollu Rural (Feader), y afecta a un presupuestu públicu total de 81 millones.

La conseyería destina anguaño 149.900 euros a l'Asociación Española de Criadores de Ganáu Vacunuo Selecto de Raza Asturiana del Monte (Aseamo) p'ayudar a caltener el llibru xenealóxicu, el desenvolvimientu de los programes de caltenimientu y la promoción d'esta raza, tamién denominada Casina.

 

Compromisu del Principáu

Álvarez destacó'l compromisu del Gobiernu d'Asturies col caltenimientu y la meyora xenética de la producción ganadera y valoró el trabayu desenvueltu nos últimos años polos criadores d'una raza “que pasó de tar en peligru d'estinción a cuntar con una importante presencia nel territoriu, sobremanera na zona oriental y nos montes del área central”.

Indicó, amás, que 20.800 exemplares de 640 criadores figuren inscritos en llibru xenealóxicu Asturiana del Monte “lo que pon de manifiestu que l'esfuerzu de los criadores, col sofitu del Principáu, ta dando resultaos na recuperación d'un animal perbién adaptáu al terrén y con característiques singulares que, amás, forma parte de la IXP Xata d'Asturies”. El censu total d'animales bovinos de la raza Casina nel Principáu ye de 25.640, ente que’l de ganáu bovino n'Asturies asítiase en 373.802 reses, de les que 8.804 pertenecen a 288 esplotaciones de Cangues d'Onís.

“La raza Asturiana del Monte atópase integrada dende tiempos inmemoriales nel paisaxe y ecosistema asturianos, cumpliendo una importante función de caltenimientu del mediu y contribuyendo en gran midida a la fixación de población n'árees de monte”, añedió. Álvarez felicitó a los profesionales del campu asturianu pol so llabor pa consiguir que nun se pierda “una riqueza xenética patrimonial propia y llograr, coles mesmes, estándares de calidá bien altos nes producciones”. Na so opinión, “la recuperación y caltenimientu d'estes races autóctones contribúin tamién a la necesaria diversificación de les esplotaciones agraries y a crear riqueza y empléu nel mediu rural”.

La conseyera aseguró que'l saneamientu de la cabaña ganadera ye “fundamental” pa la xestión de les esplotaciones y la capacidá de los productores d'adaptase a un mercáu complexu global y existente”. Asturies, que cunta con una cabana saniada, consiguió amenorgar l'índiz de prevalencia de la tuberculosis bovina al 0,08%, “datu qu'adquier una mayor relevancia si lu ponemos en relación cola media nacional, el 2,32%, lo que significa que tamos 29 veces per debaxo y amenorguemos la incidencia de la enfermedá nun 53% al respective de 2016”, añedió. La comunidá va ser declarada rexón llibre d'esta enfermedá si llogra caltenese seis años consecutivos per debaxo del 0,1%.

   Icono gráfico alusivo al tipo de archivo Audiu (Audiu: 2 Mb) (n'español)

Información sobre el documento

© Copyright 2006. Gobiernu del Principau d'Asturies