Gobierno del Principado de Asturias

Asturias, mucho más cerca

Estás en

Aniciu El Gobiernu d'Asturies convoca la primer llinia d'ayudes pa ...
 

Aniciu

El Gobiernu d'Asturies convoca la primer llinia d'ayudes pa proyectos d'investigación sobre memoria histórica

11/09/2017

 

-   Cunta con un presupuestu de 25.000 euros pa financiar estudios sobre fontes documentales y testimonios orales, xornaes, conferencies, esposiciones y actos conmemorativos

 

-   Va valorase l'interés social y la orixinalidá de les propuestes y incorpórase la perspectiva de xéneru pa visibilizar el papel de les muyeres mientres la Guerra Civil y la dictadura

 

 

El Gobiernu d'Asturies, al traviés de la Conseyería de Presidencia y Participación Ciudadana, convoca'l martes la primer llinia d'ayudes autonómiques destinaes al financiamientu de proyectos d'investigación rellacionaos cola Llei de Memoria Histórica con una dotación de 25.000 euros.

 

La convocatoria va ser publicada de forma conxunta nel Boletín Oficial del Principáu (BOPA) y na Base de Datos Nacional de Subvenciones (BDNS), plataforma adscrita al Ministeriu de Facienda y Función Pública na que toles alministraciones espublicen les sos llinies d'ayudes y subvenciones.

 

A partir d'esti martes, 12 de setiembre, va abrise un plazu de 20 díes naturales pa que les entidaes interesaes puedan presentar les sos solicitúes d’alcuerdu coles normes de la convocatoria. La cuantía máxima que se va conceder por solicitante nun va poder superar los 5.000 euros.

 

Esta llinia de subvenciones, la primera convocada pol Gobiernu d'Asturies nesta materia, ta dirixida a entidaes ensin ánimu d'arriquecimientu que tengan ente los sos fines la recuperación, divulgación y conocencia de la memoria histórica y con ella financiaránse:

 

    Estudios sobre fontes documentales y la so publicación; informes y documentos; testimonios orales; materiales didácticos y inventarios d'elementos venceyaos a la Guerra Civil y la represión franquista posterior.

    Organización de cursos, seminarios y conferencies.

    Elaboración de materiales pa la comunicación, publicidá y divulgación de les actividaes realizaes.

    Organización d'esposiciones y actos conmemorativos

 

Pa la so concesión van tenese en cuenta criterios como l'interés social de los proyectos, la divulgación de los mesmos n’ámbitu educativu, la especialización de los equipos técnicos, y la calidá técnica y orixinalidá de les iniciatives. Tamién se van tomar en considerancia la metodoloxía de trabayu, el calendariu de les actuaciones y les potenciales persones beneficiaries del estudiu.

 

Amás, la Conseyería de Presidencia introdució la perspectiva de xéneru de los proyectos presentaos como otru de los conceptos que van influyir na valoración de les solicitúes coles mires de dar visibilidá a les muyeres nos trabayos d'investigación y reivindicar el papel y el protagonismu de les mesmes nesti periodu de la nuestra hestoria.

 

Con esta convocatoria, el Gobiernu d'Asturies avanza nel cumplimientu de los sos compromisos de llexislatura pa impulsar la Llei 52/2007, de 26 d'avientu, pola que se reconocen y amplíen los derechos y establécense midíes a favor de quien carecieron persecución o violencia mientres la Guerra Civil y la dictadura. Ente les acciones realizaes destaca la firma d'un conveniu de collaboración cola Universidá d'Uviéu destináu a l'actualización del mapa de foses comunes y la base de datos de víctimes por cuenta de la Guerra Civil y la dictadura.

 

El Principáu d'Asturies y la Universidá d'Uviéu vinieron collaborando dende l'añu 2003 pal desenvolvimientu de trabayos d'identificación de foses comunes y otros llugares d'enterramientu de persones desaparecíes mientres la Guerra Civil.

 

Como resultáu d'esa collaboración, ellaboróse un primer mapa nel que figura l'allugamientu de 343 enterramientos en 55 conceyos, que dende finales del añu 2010 pue ser consultáu de forma interactiva al traviés de la páxina web del Principáu d'Asturies. Tamién esiste una base de datos nel Arquivu Históricu d'Asturies.

 

Amás, púnxose en marcha una comisión d'espertos en collaboración cola Universidá d'Uviéu y la Federación Asturiana de Conceyos (FACC) pa la ellaboración d'un catálogu autonómicu de muertes de la Guerra Civil y de la dictadura.

Información sobre el documento

© Copyright 2006. Gobierno del Principado de Asturias