Gobiernu del Principau d'Asturies

Asturies, muncho más cerca

Tas en

Asturias.es Temes Deportes Los centros de tecnificación del Principáu acueyen esti cursu a ...
 

Deportes

Los centros de tecnificación del Principáu acueyen esti cursu a 37 deportistes de rindimientu altu

El curso pasáu zarróse con resultaos escelentes, tanto nes competiciones de natación, béisbol y piragüismu como nos espedientes académicos del alumnáu becao

la directora xeneral de Deporte, Beatriz Álvarez Mesa (nel mediu de la semeya), xunto al tutor del alumnáu, Francisco Rionda, los responsables de les trés disciplines becaes, y los 37 deportistes nel pabellón de les instalaciones d'El Cristo, n'Uviéurendimiento

25/09/2019

Los Centros de Tecnificación Deportiva (CTD) del Gobiernu d’Asturies acueyen esti cursu a 37 deportistes de rindimientu altu, procedentes d’ocho comunidaes autónomes, de les disciplines de natación, béisbol y piragüismu, tal como esplicó güei la directora xeneral de Deporte, Beatriz Álvarez Mesa, nel actu de presentación del añu académicu nuevu, nel que tuvo acompañada pol tutor del alumnáu, Francisco Rionda.

Álvarez Mesa recordó los resultaos tan bonos del cursu anterior, tanto nel planu deportivu como nel académicu, y l’éxitu, un añu más, del programa Paideia d’estensión cultural pal alumnáu, impulsáu dende la Conseyería de Cultura, Política Llingüística y Turismu.

Nesti sentíu, señaló que na disciplina de piragüismu llográronse 20 medayes nos campeonatos d’España (6 oros, 8 plates y 6 bronces) y una de bronce nos del mundu.

Pela so parte, en natación consiguiéronse 25 medayes en campeonatos nacionales, 9 d’elles d’oru, y 3 n’internacionales. Amás, cinco deportistes formaron parte de la selección española en distintes competiciones.

En béisbol, centru de tecnificación de creación nueva, la selección convocó a cinco deportistes en distintes categoríes, según la edá, y ún d’ellos proclamóse campeón d’España de primer división.

Los resultaos académicos tamién foron escelentes, porque tol alumnáu becao superó’l cursu y cuatro de los deportistes llograron una calificación media de sobresaliente.

Nel CTD de Tresona, en Corvera, hai anguaño diez piragüistes en réxime internu. Amás, nes instalaciones que’l Principáu tien n’El Cristo, n’Uviéu, prepárense 16 persones en natación, 10 en modalidá interna, y 11 en béisbol, con 10 internos.

Les 37 persones becaes tienen la consideranza de deportistes de rindimientu altu y tán integraes nos planes de tecnificación de les sos respectives federaciones nacionales.

 

Información sobre el documento

© Copyright 2006. Gobiernu del Principau d'Asturies