Gobiernu del Principau d'Asturies

Asturies, muncho más cerca

Tas en

Asturias.es El Conceyu d’Uviéu gana’l III concursu de Bones Práctiques de ...
 

Aniciu

El Conceyu d’Uviéu gana’l III concursu de Bones Práctiques de Vivienda que promueve’l Principáu

- El xuráu destaca’l valor de les aportaciones del proyectu pal barriu d’El Cascayu cola mira de lluchar contra la esclusión social

13/11/2019

  • El segundu puestu foi pa la rehabilitación de les viviendes de los maestros del barriu de La Xungarosa n’Avilés

El Conceyu d’Uviéu ganó l’III Concursu de Bones Práctiques en Materia de Vivienda que promueve la Conseyería de Derechos Sociales pol so proyectu d’intervención nel barriu d’El Cascayu, que promueve la inclusión social al traviés d’esti mediu nun barriu desfavorecíu.

El director xeneral de Vivienda, Fermín Bravo, dio a conocer güei’l fallu na xunta del grupu de trabayu formáu por representantes de la conseyería, Vipasa, los equipos territoriales y los servicios sociales municipales, que s’axunten trés veces al añu pa coordinar actuaciones.

El fallu del premiu destacó que la iniciativa uviedina reflexa a les clares los retos y dificultaes de la vivienda pal inxertamientu de colectivos n’esclusión social.

Como segunda candidatura finalista reconocióse al Conceyu d’Avilés pola rehabilitación de les viviendes de maestros nel barriu de La Xungarosa, qu’engloba la so reforma, eficiencia enerxética, accesibilidá, facilidaes pa mocedá, meyora del barriu, coordinación con empléu y concursu de diseñu arquitectónicu.

El tercer puestu foi pa la iniciativa de la empresa Posada Proyectos Empoderamiento enerxéticu na vivienda pública del Principáu d’Asturies, que surdió a partir del análisis de la necesidá d’un modelu nuevu de xestión de los consumos nes viviendes públiques y d’una medría del aforru enerxéticu de los sos inquilinos.

La entrega de los cuadros acreitativos a los gallardonaos va celebrase nel primer trimestre del 2020 n’Uviéu y cola celebración d’unes xornaes d’análisis, onde se van repasar les quince candidatures que participaron nos trés años que cumple’l Concursu de Bones Práctiques en materia de Vivienda.

El Concursu de Bones Práctiques en Materia de Vivienda reconoz esperiencies que se desenvuelven nel Principáu y que puen ser esportaes a otros territorios pa dar respuesta a necesidaes nel ámbitu habitacional. El xuráu Concursu de Bones Práctiques en Materia de Vivienda tuvo integráu pola Dirección Xeneral de Vivienda, los equipos territoriales de servicios sociales y miembros de l’Asociación Española de Xestores Públicos de Vivienda y Suelu (AVS), el Colexu de Trabayu Social del Principáu, la Rede Asturiana de Llucha contra la Probeza y Esclusión Social (EAPAN-AS) y la Federación Asturiana de Conceyos (FACC).

Información sobre el documento

© Copyright 2006. Gobiernu del Principau d'Asturies