Gobierno del Principado de Asturias

Asturias, mucho más cerca

Estás en

Aniciu El Principáu promociona pela primer vez el turismu gastronómicu ...
 

Aniciu

El Principáu promociona pela primer vez el turismu gastronómicu en toles etapes de la Vuelta Ciclista a España

La Conseyería d’Empléu, Industria y Turismu tamién va poner grandes soportes promocionales en percorríu y va centrar la difusión del eventu nes redes sociales

11/09/2017

 

El Gobiernu del Principáu promociona pela primer vez anguaño, la gastronomía d’Asturies en toles etapes de la Vuelta Ciclista a España,  coles mires d’aprovechar l’impactu mediáticu y deportivu de la competición pa impulsar l’atractivu turísticu de la comunidá autónoma.

 

Nesta edición de la competición, los productos asturianos englobaos na marca Alimentos del Paraísu tán presentes na caravana publicitaria. Ufiértense degustaciones a los convitaos y ciclistes que pasaron pela zona VIP (puntu d’alcuentru) de toles etapes de La Vuelta.

 

Amás, la Conseyería d’Empléu, Industria y Turismu diseñó un plan de difusión pa rentabilizar al máximu l’acción publicitaria en medios de comunicación y redes sociales. Incluye la publicación d’artículos patrocinaos, l’allugamientu de lones xigantes y cartelos de la campaña Vuelvi al Paraísu nes zones de meta pa la so captación por cámares de televisión, puntos d’información turística, amás del repartu de merchandising ente los aficionaos.

 

El Principáu va acoyer dos finales d’etapa: el primeru en Xixón, mañana vienres, Día d’Asturies; y el segundu nel altu de L’Angliru, el sábadu. Les salíes van facese dende Casu (Parque Natural de Redes) y Corvera, respectivamente, onde tamién va haber demostración de productos asturianos y un puntu d’información turística.

 

El diseñu de les etapes d’anguaño foi frutu del alcuerdu entre UNIPUBLIC, organizadora de la Vuelta, y el Gobiernu d’Asturies, col oxetivu de compatibilizar atractivu turísticu y espectáculu deportivu.

 

La Vuelta moviliza a unes 2.500 persones, que se van agospedar n’Asturies trés nueches. En total, van ser 7.500 pernoctaciones que van inyectar a los establecimientos hoteleros unos 900.000 euros, a razón de 300.000 euros por nueche, según los cálculos de la mesma organización.

 

 

 

Información sobre el documento

© Copyright 2006. Gobierno del Principado de Asturias