Gobiernu del Principau d'Asturies

Asturies, muncho más cerca

Tas en

Asturias.es Industria solicita la collaboración de los conceyos pa impulsar ...
 

Aniciu

Industria solicita la collaboración de los conceyos pa impulsar el desenvolvimientu económicu d'Asturies

El conseyeru convida a los conceyos, al traviés de la Federación Asturiana de Conceyos, a promover planes d'eficiencia enerxética p’amenorgar la factura eléctrica. Enrique Fernández anima a esplotar el potencial económicu y d'empléu del coche eléctricu y la movilidá sostenible. Suxer l'aprovechamientu d'inmuebles comerciales vacíos y d'espacios industriales infrautilizaos, y entainar coles llicencies d'obres y d'actividaes económiques

02/12/2019

El conseyeru d'Industria, Empléu y Promoción Económica del Gobiernu d'Asturies, Enrique Fernández, plantegó a la presidenta de la Federación Asturiana de Conceyos (FACC), Cecilia Pérez, que les alministraciones locales y el Gobiernu d'Asturies desenvuelvan una fueya de ruta común que contribuya al progresu económicu y social del Principáu.

Nuna carta unviada a la presidenta de la FACC, el conseyeru pon en valor el papel que los conceyos asturianos pueden desempeñar nel desenvolvimientu territorial, al traviés de midíes y programes en llinia coles polítiques desenvueltes pol Gobiernu asturianu, que tán empobinaes a llograr una “crecedera económica inclusiva y sostenible, que dexe xenerar riqueza y rentes abondes pa caltener una calidá de vida y un estáu del bienestar afayadizu”.

Pal conseyeru d'Industria, ”yá qu’Asturies ye la suma de los 78 conceyos que la conformen, esisten, al nuestru paecer, una serie de midíes d'ámbitu municipal que pueden contribuyir al desenvolvimientu económicu rexonal. Por esta razón solicítote que valores, nel senu de la institución que presides, treslladar a los conceyos asturianos la conveniencia d'adoptar una serie de midíes que dexen contribuyir al desenvolvimientu del nuestru territoriu”.

Ente estes midíes, el conseyeru d'Industria numbera cuatro acciones:

  • La promoción de planes de sostenibilidá, aforru y eficiencia enerxética municipal como mediu pa rebaxar la factura enerxética, contribuyir al amenorgamientu de les emisiones d'efectu invernaderu y potenciar les actividaes económiques vinculaes a estes actividaes.
  • Fomentar la movilidá sostenible mediante la instalación de puntos de recarga de vehículos eléctricos y de gas.
  • La identificación de locales comerciales vacíos y espacios industriales infrautilizaos pa promover la so puesta nel mercáu, “valorando la posibilidá d'aplicar midíes fiscales, o d'otra mena, pa la so puesta en funcionamientu”.
  • Entainar la tramitación alministrativa de llicencies d'obra y d'actividaes económiques “como fórmula p'acelerar la execución d'inversiones xeneradores de riqueza y empléu”.

Toes estes midíes, a xuiciu d'Enrique Fernández, van suponer beneficios non solo a nivel municipal sinón tamién pal conxuntu del Principáu, polo que pon a disposición de la FACC y de los 78 conceyos el sofitu y asesoramientu técnicu de la Fundación Asturiana de la Enerxía (Faen) y de la mesma conseyería.

Información sobre el documento

© Copyright 2006. Gobiernu del Principau d'Asturies