Gobiernu del Principau d'Asturies

Asturies, muncho más cerca

Tas en

Asturias.es Temes Industria y enerxía El Gobiernu d'Asturies recuerda que la mesa sobre la ...
 

Industria y enerxía

El Gobiernu d'Asturies recuerda que la mesa sobre la descarbonización respuende a una iniciativa de la patronal y los sindicatos

El Principáu destaca que'l grupu de trabayu tien un oxetivu técnicu, de la que resalta la so disposición al diálogu coles fuerces parlamentaries

14/10/2019

El conseyeru d'Industria, Empléu y Promoción Económica, Enrique Fernández, señaló güei que la constitución de la Mesa Rexonal de Descarbonización respuende a una propuesta plantegada pola Federación Asturiana d'Empresarios (Fade) y los sindicatos Comisiones Obreres y ún de los compromisos anunciaos pol conseyeru na comparecencia parlamentaria na qu'espunxo'l so programa de llexislatura.

L'Executivu tamién destaca que la mesa tien un oxetivu básicamente técnicu: diagnosticar y evaluar la repercusión de la transición enerxética pal conxuntu del territoriu y la economía asturiana, de manera particular sobre'l texíu industrial. A esi propósitu respuende la so composición: Executivu central (Ministeriu pa la Transición Ecolóxica), Gobiernu d'Asturies (Conseyería d'Industria) y Federación Asturiana de Conceyos, xunto con Fade, Femetal, UXT, CC. OO. y les sos respectives federaciones d'Industria.

La finalidá, por tanto, nun ye algamar un alcuerdu políticu, totalmente deseable, sinón realizar una evaluación técnica sobre los riesgos, amenaces y oportunidaes del procesu de transición enerxética. A títulu d'exemplu, el Gobiernu d'Asturies va caltener mañana una xunta con tolos grupos parlamentarios pa consensuar un planteamientu al respective de al financiación autonómica. "Son criterios de composición distintos porque son foros y oxetivos distintos. Tampoco na concertación participen los grupos parlamentarios y a naide-y asocede falar d'esclusión de los partíos", manifestó'l titular d'Industria.

L'Executivu sorraya la so vocación amplia de diálogu, tanto coles fuerces polítiques como colos axentes sociales. Al so xuiciu, la mesma formación de la mesa, una iniciativa afalada polos sindicatos y la patronal, ye una prueba d'esa voluntá. Poro, nun cabe falar d'esclusión nin marxinación de les fuerces parlamentaries. Bien a lo contrario, el Principáu aprofia la so disposición al consensu sobre los grandes asuntos d'Asturies.

Información sobre el documento

© Copyright 2006. Gobiernu del Principau d'Asturies