Gobiernu del Principau d'Asturies

Asturies, muncho más cerca

Tas en

Asturias.es El CEEI impulsa la puesta en marcha de 41 empreses innovadores ...
 

Aniciu

El CEEI impulsa la puesta en marcha de 41 empreses innovadores nos campos de la biotecnoloxía y les ciencies de la salú

- La ministra de Sanidá, Consumu y Bienestar Social visitó güei la bioincubadora d’esti organismu pa conocer los programes en promoción del emprendimientu y consolidación

13/08/2019

   - El Centru Européu d’Empreses y Innovación captó 9,6 millones en financiación pa 78 proyectos dende’l 2002
   - El desenvolvimientu de dispositivos pa enfermos de párkinson, mecanismos pal control de dolencies cróniques y programes d’avieyamientu activu destaquen ente les llinies de trabayu

El Centru Européu d’Empreses y Innovación (CEEI) impulsó dende’l 2002 la puesta en marcha de 41 empreses especializaes nel desenvolvimientu de productos y servicios nos ámbitos de la biotecnoloxía y les ciencies de la vida y la salú, ente les que destaquen 11 proyectos d’avieyamientu activu qu’usen la realidá virtual, dispositivos pa enfermos de párkinson, mecanismos pal control de dolencies cróniques y programes de trabayu del bienestar al traviés de la sonocéutica, una técnica de sincronización neuronal inducida por soníu. El centru ye anguaño’l recursu de referencia del emprendimientu innovador y de base tecnolóxica n’Asturies.

Amás, al traviés de los programes BioCEEI, BioCEEI Salú, BioCEII Helth & Medical y BioCEEI Salú y Avieyamientu Activu, el CEEI dio asesoramientu a 141 proyectos y empreses. Aparte, 78 bioemprendedores concretaron les sos idees empresariales col sofitu del centru.

Los responsables del CEEI esplicaron güei estos datos a la ministra de Sanidá, Consumu y Bienestar Social, María Luisa Carcedo, que visitó la bioincubadora d’esti equipamientu acompañada polos conseyeros d’Industria, Empléu y Promoción Económica, Enrique Fernández; de Salú, Pablo Fernández Muñiz, y de Ciencia, Innovación y Universidá, Borja Sánchez. Tamién asistieron representantes de les entidaes asociaes al centru européu que formen parte de los sos órganos de gobiernu: Cámares de Comerciu, Industria y Navegación, l’Asociación d’Empresarios Mozos (FOLIE), la Federación Asturiana d’Empresarios (Fade), la Universidá d’Uviéu y Liberbank.

Les instalaciones consten de seis llaboratorios con oficina integrada, una sala d’instrumental común y otros servicios pal agospedamientu d’entamadores y firmes del sector. En collaboración cola Universidá d’Uviéu, tamién se punxeron en marcha nueve másteres rellacionaos cola biotecnoloxía y la creación de compañíes innovadores.



Proyectos de base tecnolóxica

El CEEI ufierta un sofitu completu, dende la xeneración de les idees hasta la so puesta en marcha y desenvolvimientu, con atención especial al financiamientu. Na actualidá, empobina l’actividá a los proyectos de base tecnolóxica. Asina, una de cada cuatro iniciatives que lleguen al centru tien un componente de desenvolvimientu de tecnoloxía.

Amás de la biotecnoloxía y la salú, dende’l CEEI impúlsense proyectos d’industria creativa y dixital, la industria 4.0 o la movilidá sostenible, coles mires de que se conviertan nuna ferramienta clave na innovación y el desenvolvimientu tecnolóxicu rexonal.

Dende la so creación en 1994, el Centru Européu d’Empreses y Innovación atendió a camín de los 13.000 entamadores con 7.500 proyectos, de los que 1.665 cristalizaron n’empreses nueves. Esti llabor dexó crear cuasi 3.800 puestos de trabayu. La captación de financiamientu pal desenvolvimientu de los proyectos algama los 30,68 millones.

La tasa de supervivencia de les empreses a los cinco años de la so constitución ta nel 66,19 %, un 25,4 % percima de la media nacional.

 

Información sobre el documento

© Copyright 2006. Gobiernu del Principau d'Asturies