Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies impulsa la puesta en marcha de la ...
 

Aniciu

El Gobiernu d'Asturies impulsa la puesta en marcha de la comisión asesora del Centru de Menores de Sograndio

— L'Executivu aprueba'l marcu regulatoriu d'esti órganu d'asesoramientu y apoyu, que va tener calter plural y participativu. — Va Cuntar con presencia de la dirección, l'equipu socioeducativu, representantes de los internos y entidaes collaboradores

13/05/2018

El Gobiernu d'Asturies aprobó la constitución de la comisión asesora del Centru de Responsabilidá Penal de Menores Casa Xuvenil de Sograndio, l'órganu d'asesoramientu y apoyu al funcionamientu d'esta entidá pública dedicada al cumplimientu de les midíes privatives de llibertá de menores infractores y a la so reinserción social.

D’alcuerdo cola resolución que va publicase mañana nel Boletín Oficial del Principáu d’Asturies (BOPA), la comisión constitúyese con dos oxetivos básicos: per una parte, la ellaboración d'informes y propuestes sobre'l funcionamientu xeneral del centru y, por otra, l'análisis anual de los documentos d'organización y del proyectu educativu, xunto cola ellaboración de propuestes pal so cambéu y reforma.

Tocantes a la composición, l'órganu va tener calter plural y participativu y va tar integrada por estes persones: el director del centru, que de la mesma va ser el presidente; l'equipu socioeducativu (representáu por 8 persones, unes de les cuales va ocupar la secretaría), y 5 representantes de los internos de los cinco módulos de Sograndio. Amás, va cuntar con presencia de les entidaes que collaboren nos programes educativos y d'intervención, que la so elección va ser determinada na sesión constitutiva de la comisión. Nel casu de la representación de los internos, el centru va promover una actividá educativa pa que sían los mesmos menores quien escueyan a los sos delegaos.

Pa la ellaboración del marcu regulador cuntóse coles aportaciones del comité d'empresa del centru, al que se-y unvió'l borrador de resolución pa que plantegara allegamientos y propuestes. Les observaciones aceptaes faen referencia a la composición del equipu socioeducativu, la imparcialidá de la presidencia nel desenvolvimientu de los alderiques y la posibilidá de que la comisión pueda actuar en plenu o en comisiones de trabayu.

El Centru de Menores de Sograndio ye'l recursu públicu de referencia n'Asturies pal cumplimientu de les midíes privatives de llibertá contemplaes na llei orgánica de responsabilidá penal de los menores. Dispón de 61 places y anguaño cunta con 26 internos atendíos por un equipu de 84 persones, ente personal docente y socioeducativu, coordinadores y dirección, y profesionales sanitarios.

Con un presupuestu de 5,8 millones y un costu de 81.205 euros por plaza, configúrase como una institución que'l so oxetivu ye la reeducación y reinserción de los internos por aciu acciones de naturaleza educativa, d’alcuerdo col espíritu de la Llei Orgánica del Menor. Pa ello, desenvuelve un programa de reorientación impartíu por personal especializáu que garantiza a los internos l'accesu a la educación básica y obligatoria. Tamién se-yos ufierta formación profesional y asesoramientu llaboral, de cara a facilitar la so reinserción na sociedá.

 

 

Información sobre el documento

© Copyright 2006. Gobiernu del Principau d'Asturies