Gobiernu del Principau d'Asturies

Asturies, muncho más cerca

Tas en

Asturias.es El Grupu d’Inspección del Xuegu desenvuelve una operación contra ...
 

Aniciu

El Grupu d’Inspección del Xuegu desenvuelve una operación contra dos práctiques illegales na Selmana Negra de Xixón

La intervención, realizada col apoyu del Cuerpu Nacional de Policía, saldóse con seis deteníos, la incautación de más de 4. 000 euros y el precintu de trés estands

Un momento de la operación

11/07/2018

El Grupu d’Inspección del Xuegu del Principáu desenvolvió ayeri pela tarde una operación contra dos modalidaes de xuegu illegal na Selmana Negra de Xixón. La intervención, que cuntó col sofitu de la Unidá de Prevención y Reacción del Cuerpu Nacional de Policía na ciudá, saldóse con seis deteníos: cuatro ciudadanos nicaragüenses y dos mexicanos, n’aplicación de la Llei d’Extranxería.

Amás, los axentes prindaron más de 4.000 euros n’efectivo y precintaron trés estands del certame.

Una d’eses práctiques illegales ye la estafa puerca o Razzle, común en países d’América central, que consiste en que los xugadores tiren 8 boles coles que van sumando puntos nun tableru con 144 furacos, numberaos aleatoriamente del 1 al 6, pa llevar premios como televisiones o motocicletes. Nes primeres tiraes, los estafadores dan-yos más puntos de los que-yos correspuenden, con cuenta de que sigan apostando, pero’l xuegu ta diseñáu de manera que nunca s’algama la puntuación necesaria pa llevar los premios.

Amás de tratase d’una modalidá illegal dende’l puntu de vista alministrativu, tamién pue ser constitutiva de falta o delitu d’estafa, a tenor de la cantidá de dineru xugada.

El Grupu d’Inspección tuvo conocencia d’esti tipu de práctiques n’Asturies nel mes d’abril. A partir d’entós, activáronse los dispositivos de vixilancia en romeríes y fiestes, hasta que se detectó na Selmana Negra.

La otra modalidá illegal implica la compra d’unes papeletes coles que, supuestamente, pueden ganase premios, dependiendo del númberu que contengan. Sicasí, los estafadores llogren col cambiazu de los boletos qu’esos premios nunca se materialicen.

El Grupu d’Inspección del Xuegu d’Asturies ta formáu por cinco axentes de la Policía Nacional, adscritos al Principáu en virtú d’un conveniu de collaboración col Ministeriu del Interior, que vixilen el cumplimientu de la normativa en materia de xuegu y apuestes.

La operación realizada ayeri demuestra’l compromisu del Gobiernu autonómicu, al traviés de la Conseyería de Presidencia y Participación Ciudadana, cola tresparencia nel desenvolvimientu de xuegos y apuestes, y confirma la eficacia de los mecanismos de control pa que nun se produzan fraudes.

 

 

Información sobre el documento

© Copyright 2006. Gobiernu del Principau d'Asturies