Gobiernu del Principau d'Asturies

Asturies, muncho más cerca

Tas en

Asturias.es El Conseyu de Patrimoniu Cultural remata los trámites para ...
 

Aniciu

El Conseyu de Patrimoniu Cultural remata los trámites para entainar obres na redolada de protección del Camín de Santiago

L'órganu aprueba la propuesta de facilitar intervenciones nos centros históricos de Llanes, Ribeseya, Tazones, Salas, Cuideiru y Cangas. El plenu abre la vía pa la inclusión nel Inventariu del Patrimoniu Cultural de les rutes xacobees al so pasu polos conceyos d'Ayer y Pravia

La consejera de Cultura, Berta Piñán, y el director general de Cultura y Patrimonio, Pablo León, durante el pleno

13/10/2020

El plenu del Conseyu del Patrimoniu Cultural d'Asturies, presidíu pola conseyera Berta Piñán, dio güei el vistu bonu a los trámites realizaos en tol añu coles mires d'entainar determinaes obres na redolada de protección del Camín de Santiago.

N'una llinia asemeyada, destinada a amenorgar los tiempos pa les intervenciones n'espacios protexíos, tamién s'alcordó empecipiar los trabayos alministrativos que van permitir acometer actuaciones n'una serie de conxuntos históricos de la comunidá. Cuando remate esta tramitación, estes intervenciones van considerase autorizaes de forma xeneral, siempre que se cumplan una serie de condiciones técniques que tendrán d'evaluar los conceyos implicaos.

La intención de la Conseyería de Cultura ye entainar esti tipu de xestiones, ensin perxuiciu de que s'efectúe la supervisión oportuna para garantizar la preservación de los bienes protexíos. Los conxuntos históricos propuestos por que puedan llevase a cabu esti tipu d'intervenciones son los de Llanes, Ribeseya, Tazones (Villaviciosa), Salas, Cuideiru y Cangas.

Les midíes para intervenir na redolada del Camín de Santiago, yá aprobaes, mesmo que les que van afectar a los conxuntos históricos cuando remate la so tramitación, faen referencia al arreglu de zarros tradicionales de muries, zarros vexetales, xardinería de parceles, obres d'adecuación interior (n'edificios que nun tean individualmente protexíos) y esterior, pintura esterior, llimpieza y sustitución de canalones o reteyáu y retecháu, ente otres actuaciones.



Rutes xacobees históriques

El plenu tamién decidió empecipiar el procesu pa incluyir nel Inventariu del Patrimoniu Cultural d'Asturies el Camín de Santiago al so pasu polos conceyos d'Ayer y Pravia, al ser rutes xacobees consideraes históriques.

Cultura marca'l trayectu ayerán na ruta entendida ente'l puertu de San Isidro y l'enllaz col Camín del Salvador n'Uxo (Mieres). La propuesta presentada nel plenu consiste en cinxir la protección llegal a los tramos d'interés patrimonial del percorríu mentáu, ente que'l restu de los tramos (coincidentes na so mayor parte con carreteres autonómiques) van garantizar la continuidá del trazáu, anque nun van gociar de midíes de protección.

Per otra parte, les rutes que cunten con una clara vinculación col fenómenu xacobéu nel conceyu de Pravia son les siguientes: la que va a la capital del conceyu pela barca de Forcinas, la ruta de Pravia a Maecina pel valle d'Arango, y la de Pravia a les Luiñas per Villafría. Lo mesmo que nel casu d'Ayer, la protección patrimonial va llindase a los tramos d'estos caminos que cunten con elementos d'interés cultural.

Les propuestes d'inclusión nel IPCA de les rutes xacobees d'Ayer y Pravia obedecen a la midida contemplada nel Llibru Blanco del Camín de Santiago que señala la necesidá d'avanzar escontra la protección de les víes documentaes como históriques, anque ensin llegar en nengún casu a oldeales col nivel de protección BIC, col que cunten los caminos principales: el Primitivu, el Costeru y el d'El Salvador.

El plenu tamién aprobó l'entamu de los trámites pa incluyir nel IPCA los campamentos romanos de Pedra Dereta y de El Chao de Carrugueiro, dambos alcontraos nel conceyu de Boal.

Información sobre el documento

© Copyright 2006. Gobiernu del Principau d'Asturies