Gobiernu del Principau d'Asturies

Asturies, muncho más cerca

Tas en

Asturias.es Temes Medios de comunicación El Principáu pon en marcha un ampliu dispositivu de siguimientu ...
 

Medios de comunicación

El Principáu pon en marcha un ampliu dispositivu de siguimientu pa facilitar la difusión de los resultaos electorales del 26-M

L'Alministración autonómica va esplegar a 894 representantes que van disponer de 701 tabletes pa garantizar la correcta tresmisión de los sufraxos dende les 1. 573 meses habilitaes. La ciudadanía va poder siguir la evolución del recuentu al traviés d'una web y d'una aplicación gratuita pa móviles y tabletes. Los medios de comunicación van cuntar con un espaciu para desenvolver el so llabor nel Palaciu del Conde de Toreno, onde se va centralizar el siguimientu de la xornada

22/05/2019

El Gobiernu d'Asturies pon en marcha un ampliu dispositivu de siguimientu para facilitar l'espardimientu de los resultaos de les elecciones a la Xunta Xeneral del Principáu que se van celebrar el próximu domingu, qu'inclúi l'usu de tabletes pal treslláu eficaz de los datos, aplicaciones móviles y retrasmisiones en directu.

La xornada del 26-M va empezar a les 08:00 hores cola apertura de los colexos electorales y la constitución, media hora depués, de les meses. A les 09:00 hores empecipiará la votación y ta previsto facilitar meyores de participación a les 14.00 y a les 18:00 hores. A les 20:00 van cerrase los colexos y va empezar l'escrutiniu. Dada la coincidencia de trés procesos electorales, l'orde en que se va llevar a cabu'l recuentu, en cumplimientu de la Llei Orgánica 5/1985, de 19 de xunu, del Réxime Electoral Xeneral, va ser el siguiente: comicios al Parlamentu Européu, municipales y autonómicos.

Los resultaos provisionales van poder consultase na web www.resultadoselecciones2019.asturias.es

Asturies cunta con 615 locales electorales distribuyíos nos 78 conceyos, onde se van instalar 1.573 meses nes que van poder exercer el so derechu a votu 973.736 persones. L'Alministración va distribuyir pol territoriu de la comunidá a 894 representantes que van disponer de 701 tabletes pa la correcta tresmisión de los sufraxos.

El siguimientu de la xornada electoral va desenvolvese nel Palaciu del Conde de Toreno, n'Uviéu, onde s'instaló'l Centru d'Espardimientu de Datos (CDD) pa ufiertar a los medios de comunicación acreditaos diversos recursos y sistemes d'accesu a la información. Nesi allugamientu van disponer de conexón a internet, señal institucional d'audiu y vídeu, datos en formatu de gráficos de televisión y terminales de consulta interactiva, mesmo qu’un sistema de distribución d'información web al quel van poder aportar en tou momentu.

Nel CDD van habilitase distintos espacios:

Zona de prensa. Los medios van disponer d'un espaciu de trabayu específicu que va incluyir accesu a internet por aciu rede wifi, pantalles con señal de televisión pa poder visualizar les principales cadenes de TDT, pantalles cola señal institucional producida mientres les ruedes de prensa y carruseles d'información multimedia en formatos de gráficos pa televisión colos principales datos de participación y resultaos provisionales, según se vayan produciendo.

Zona de ruedes de prensa. El conseyeru de Presidencia y Participación Ciudadana, Guillermo Martínez, va ufiertar nesti espaciu delles ruedes de prensa para informar sobre'l desenvolvimientu de la xornada electoral, los datos de meyores de participación y los resultaos provisionales. Na sala instalóse'l sistema que va xenerar los carruseles d'información multimedia que se van presentar en pantalla y que se van apurrir tamién a los medios en formatu de gráficos pa televisión incluyíos na señal institucional.



Señal institucional

Nel CDD va producise'l programa d'imaxe y soníu de les ruedes de prensa. Esti programa va ser realizáu y apurríu a los medios de comunicación en señal profesional de calidá broadcast pa que puedan usalo directamente n'antena. Los formatos técnicos d'estes señales son los siguientes: vídeu en formatu d'imaxe 16:9 apurríu en señal dixital SDI-HD y SDI-SD, dambos con audiu embebíu, y audiu analóxicu en canon XLR, monu.



Difusión de resultaos

La ciudadanía va disponer d'un serviciu de consulta en tiempu real na web www. resultadoselecciones2019. asturias.es (a la que puede aportase tamién dende l'enllaz asturias. infoelecciones.es) a distintos niveles d'agregamientu: comunidá, circunscripción y conceyu. El portal ye accesible pa los navegadores más comunes y por terminales, tanto fixos como móviles.

La información que va ufiertar ye la siguiente:

Apertura y meyores. Datos básicos pa cada ámbitu xeográficu: censu electoral, númberu de meses, votantes y porcentaxes de participación. Tamién se van facilitar otres consultes, como resumes de circunscripciones.

Escrutiniu. Datos básicos: porcentaxe escrutado, votantes, astención, desglose del votu, diputaos a escoyer, votos, porcentaxes y diputaos escoyíos por candidatura. van habilitase, coles mesmes, otres consultes como resumes de circunscripciones y comparances colos resultos de 2015. Tocantes a los formatos, van facilitase presentaciones tabulares, diagrames de barres, hemiciclos, mapes xeográficos por circunscripciones ya informes impresos.



Ruedes de prensa

Al traviés de la web tamién podrá aportase a les retresmisiones per internet de les distintes ruedes de prensa que va ufiertar el conseyeru de Presidencia pa informar del desenvolvimientu de la xornada electoral. Estes emisiones van poder siguise tanto en directu como en diferío, al traviés d'un enllaz na páxina de resultaos que va permanecer disponible pal públicu una vegada concluyida cada rueda de prensa. Esto va permitir el siguimientu en vídeu y audiu de les comparecencies dende cualesquier llugar con accesu a internet.



Espardimientu por aciu dispositivos IOS y Android

Creóse xuna aplicación gratuita pa dispositivos qu'utilicen sistemes operativos IOS y Android, que va facilitar datos de candidatures, participación y resultaos del escrutiniu provisional por aciu teléfonos intelixentes y tabletes. L'aplicación va poder descargase gratis d’Aple store y Google Play dende’l próximu vienres y les consultes van desglosarán al traviés de los epígrafes:

Principáu d'Asturies.

   - Circunscripciones.
   - Centru
   - Conceyos.
   - Occidente.
   - Conceyos.
   - Oriente.
   - Conceyos.

La información va poder consultase en forma gráfica o en llistáu y siempre con datos comparativos de los comicios autonómicos de 2015.



Dosier de resultaos

Una vegada rematáu l'escrutiniu provisional, va publicase un dosier de resultaos en formatu pdf que va incluyir información por circunscripciones, candidatures más votaes y la composición provisional del Parlamentu asturianu.



Aplicación de consulta de resultaos provisionales

Tres el procesu de recuentu provisional, va editase una aplicación interactiva de consulta que va permitir esplotar la información sobre resultaos y participación de distintes formes. Esta ferramienta va tar disponible pa les últimes versiones de los sistemes operativos Windows, Linux y Mac.



Publicación de resultancies definitives na web electoral

Una vegada concluyíu l'escrutiniu definitivu per parte de la Xunta Electoral Provincial, van publicase los resultaos definitivos cola mesma estructura, diseñu y funcionalidá de l'aplicación descargable de resultaos provisionales.

 

Información sobre el documento

© Copyright 2006. Gobiernu del Principau d'Asturies