Gobiernu del Principau d'Asturies

Asturies, muncho más cerca

Tas en

Asturias.es Temes Cultura El Principáu completa la convocatoria de los sos circuitos col ...
 

Cultura

El Principáu completa la convocatoria de los sos circuitos col de Cultura Tradicional

El programa súmase al d’Artes Escéniques, yá en marcha, y a los de Música, Lliteratura y Artes Plástiques y Visuales

21/10/2020

La Conseyería de Cultura, Política Llingüística y Turismu convoca'l Circuitu de Cultura Tradicional, col que completa les propuestes que'l Principáu plantega al sector cola fin de sofitar la programación d'espectáculos, eventos y esposiciones per toa Asturies. Cultura punxo en marcha'l circuitu d'Artes Escéniques a primeros d'ochobre y la selmana pasada, los de Lliteratura, Música y Artes Plástiques y Visuales.

Esta convocatoria tien por oxetu escoyer proyectos, actividaes y actuaciones de divulgación de la historia, el patrimoniu, la cultura popular y la tradición asturiana pa programalos en centros y espacios culturales de distintos conceyos. Lo mesmo que col restu d'iniciatives, la conseyería apuesta por un sistema de cofinanciación pal que'l Gobiernu d'Asturies aporta ente'l 50% y el 90% del presupuestu de cada esposición, espectáculu o eventu. Esti porcentaxe varia en función de la población de los conceyos, de forma que aquellos con menos habitantes reciben mayor sofitu. En total, al circuitu de Cultura Tradicional van dedicase 45.000 euros.

El programa ta abiertu a proyectos d'espardimientu de la cultura etnográfica, el folclore, los oficios y deportes tradicionales, la gastronomía y los bailles y composiciones musicales, mesmo qu’al desenvolvimientu de proyectos de reinterpretación contemporanea de la tradición. Amás, contémplase la difusión del patrimoniu por aciu conferencies y charles de divulgación venceyaes cola antropoloxía, l'arqueoloxía o la ciencia, o bien al traviés de proyectos audiovisuales, espositivos o diseñu de rutes interpretatives.

Tanto los conceyos interesaos en sumase al programa como los profesionales o entidaes que quieran presentar los sos proyectos a esti circuitu han rexistrase como usuarios al traviés de la web de Llaboral Ciudá de la Cultura www.laboralciudaddelacultura.com

En rexistándose, los interesaos van poder presentar la solicitú y la documentación que se rique na convocatoria nesa mesma plataforma. El plazu de presentación de les solicitúes remata a les 14:00 hores del próximu 6 de payares.

Información sobre el documento

© Copyright 2006. Gobiernu del Principau d'Asturies