Gobierno del Principado de Asturias

Asturias, mucho más cerca

Estás en

Aniciu Temes Vivienda El Principáu remata los trabayos pa retirar el bloque de roca ...
 

Vivienda

El Principáu remata los trabayos pa retirar el bloque de roca qu'amenaciaba delles viviendes en La Cuesta los Valles, en Llaviana

Les obres urxentes, axudicaes a la empresa Tragsa en 49. 627 euros, empezaron el 28 d'abril. El riesgu de desprendimientu y el difícil accesu obligaron a cuntar con especialistes n'escalada

08/06/2020

La Conseyería de Presidencia remató güei les obres de baltar y retirar el bloque predrosu inestable asitiáu na turria de desmonte del camín d'accesu a La Cuesta los Valles, na localidá de La Bárgana (Llaviana), qu'amenaciaba un grupu de viviendes.

Los trabayos empezaron el 28 d'abril y fueron axudicaos a la empresa Tragsa por un importe de 49.627 euros, con un plazu d'execución de dos meses.

Pa evitar la cayida de materiales, instalóse a media fastera una barrera dinámica convencional. La estructura de soporte ta formada por postes d'aceru asitiaos cada 10 metros y rede de cables, y la estructura de contención, por paneles de rede d'aníos xuníos ente sí. Darréu, asitióse una doble malla de protección d'aceru galvanizáu triple torsión pa cubrir l’área, nuna superficie d'unos 400 metros cuadraos, a manera de revestimientu de la peña.

En tando la zona potexida, baltóse'l peñón inestable por aciu un sistema de fragmentación instantánea con pequenes voladures controlaes, pa lo que resultó necesario cuntar col sofitu d'especialistes n'escalada. La baltadera de la roca en bloques de tamañu pequeñu y l'ausencia de vibraciones y ruios embrivieron el riesgu de daños na redolada. Esta fase, la más delicada, duró trés díes.

Darréu, reacomodáronse los bloques de piedra depositaos nel terrén de forma natural y treslladáronse a un vertideru'l restu de piedres y materiales estazaos.

Superada esta fase, comprobóse l'estáu de la barrera dinámica y de la malla triple torsión. Nesta postrera, reparáronse les alvioles que se deterioraron tres la fragmentación y dispunxéronse unos cables perimetrales, con vistes a caltener de forma permanente les protecciones sobro la turria.

A lo último, llimpióse tola zona y restituyóse el pavimentu d'un tramu del camín deterioráu de resultes de les obres.

Información sobre el documento

© Copyright 2006. Gobierno del Principado de Asturias