Gobierno del Principado de Asturias

Asturias, mucho más cerca

Estás en

Aniciu Temes Educación Una de cada cuatro families escueye solicitar plaza en centros ...
 

Educación

Una de cada cuatro families escueye solicitar plaza en centros educativos pal cursu viniente de forma telemática

La xestión electrónica dexó aforrar tiempu y recursos a la ciudadanía y a la propia Alministración autonómica. Cuasi 10. 000 estudiantes han formalizar la matrícula ente’l 23 y el 31 de xunetu y del 1 al 7 de setiembre

27/06/2020

La Conseyería d’Educación remató con éxitu’l procedimientu d’almisión del alumnáu en centros sosteníos con fondos públicos que, pela primer vez, podía realizase tamién de forma telemática. En total, solicitaron plaza 9.974 estudiantes que s’incorporen pela primer vez al sistema educativu o que camuden de centru. D’ellos, más del 25 % (ún de cada cuatro) optaron pola tramitación online.

Les families qu’usaron esta postrer alternativa teníen a la so disposición un formulariu específicu n’Educastur y na web del Gobiernu d’Asturies que, desque rellenáu, unviábase al traviés d’una plataforma electrónica xestionada pola Dirección Xeneral de Sector Públicu, Seguranza y Estratexa Dixital, en coordinación cola Dirección Xeneral de Planificación y Infraestructures Educatives. Amás, cola mira de facilitar les xestiones, editóse una guía y un videu tutorial y habilitáronse siete llinies telefóniques d’ayuda y consulta.

La solicitú electrónica d’almisión dexó que les persones qu’escoyeron esta modalidá nun tuvieren que presentar documentación adicional, como’l DNI/NIE o l’acreitación de la condición de familia numberosa o de discapacidá polos qu’integren el nucleu familiar. Tamién ye la primer vez que nun s’esixe a padres o tutores el volante de residencia, colo que se simplificó al máximu esti procedimientu. D’esta forma, aforráronse desplazamientos a les Cases del Conceyu pa sacar el certificáu d’empadronamientu.

Nesti sentíu, consultáronse los datos del padrón municipal correspondientes a 7.716 persones, lo que supunxo un aforru pa la ciudadanía y la mesma Alministración autonómica, que procesó esos datos con más rapidez y de forma automatizada dafechu. Amás, recibiéronse solicitúes cursaes dende dellos continentes que fore imposible xestionar presencialmente poles llimitaciones de la movilidá.

Desque presentaes les solicitúes d’almisión nel centru escoyíu como primer opción, el martes que vien, día 30 de xunu, van publicase les llistes provisionales del alumnáu almitío y el 14 de xunetu, en resolviendo les alegaciones, van salir les definitives.

La baremación va tener en cuenta si l’alumnu o alumna tien hermanos o hermanes matriculaos nel centru, si los padres o madres tán empleaos ellí y si dalgún de los sos representantes llegales trabaya na redolada. Amás, va valorase si cumple con un determináu nivel de renta, si la familia ye numberosa o monoparental o si la persona solicitante s’atopa en situación d’acoyimientu familiar. Va evaluase tamién l’espediente académicu y si los integrantes del nucleu familiar tienen discapacidá.

La matrícula de los estudiantes d’Infantil, Primaria, Secundaria y primeru de Bachilleratu que pasen de cursu, y d’aquellos de segundu de Bachilleratu que nun titularen, ha formalizase ente’l 23 y el 31 de xunetu. El restu del alumnáu ha inscribise ente’l 1 y el 7 de setiembre.

Información sobre el documento

© Copyright 2006. Gobierno del Principado de Asturias