Gobiernu del Principau d'Asturies

Asturies, muncho más cerca

Tas en

Asturias.es Temes Investigación El Principáu participa nun grupu de trabayu européu que busca ...
 

Investigación

El Principáu participa nun grupu de trabayu européu que busca aprovechar el potencial de les tecnoloxíes nos servicios sociales

Esta iniciativa, enmarcada na Rede Social Europea, busca aumentar la eficiencia na xestión y ameyorar l'atención

15/10/2019

El Gobiernu d'Asturies, al traviés de la Conseyería de Derechos Sociales y Bienestar, va formar parte del grupu de trabayu qu'impulsa la Rede Social Europea (ESN), principal asociación internacional n’ámbitu de los servicios sociales, p’analizar el potencial de les tecnoloxíes de la información y les comunicaciones nesta área.

El foru, que va constituyise esta selmana en Berlín y va enllargar los sos trabayos hasta l’añu próximu, va tar integráu por representantes de Suiza, Malta, Alemaña, Italia, Bélxica, Austria, Letonia, Inglaterra, Croacia, Portugal y España. Por parte del Executivu rexonal, va participar la coordinadora de Calidá y Xestión de la Conocencia de la Dirección Xeneral de Planificación, Ordenación y Adaptación al Cambéu Social, Diana Fernández Zapico.

Los técnicos europeos van analizar les meyores práctiques puestes en marcha nos distintos países n’ámbitu de la dixitalización de los servicios sociales y van buscar respuestes pa los desafíos éticos que supón el tresformamientu dixital; por exemplu, pa garantizar la protección de datos o blindar la seguridá cuando se comparte información al traviés d'internet. L'oxetivu final ye incrementar la eficiencia na xestión y ameyorar l'atención a la ciudadanía.

Tamién van estudiar la función de les aplicaciones y los medios tecnolóxicos, l'usu de la intelixencia artificial y los sistemes de xestión de casos. Asina mesmo, van evaluar cómo estes meyores dixitales pueden ayudar a ameyorar la calidá de vida de la población.

Les conclusiones van quedar recoyíes nun manual de bones práctiques, que va formar parte de la biblioteca de la ESN, y van presentase na XXVlI Conferencia Social Europea de Servicios Sociales, que va tener llugar en Hamburgo l’añu próximu y va analizar la forma en que la tecnoloxía incide nesti campu.

Información sobre el documento

© Copyright 2006. Gobiernu del Principau d'Asturies