Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El to Conceyu Coxersa y el Conceyu de Carreño modernicen la recoyida de ...
 

El to Conceyu

Coxersa y el Conceyu de Carreño modernicen la recoyida de residuos en Candás

El modelu nuevu, al estilu européu, propón menos díes de recoyida de la basura mecío. Les families van recibir de baldre un calderu marrón y los restaurantes y tiendes d’alimentación, contenedores especiales

D'esquierda a derecha: El conceyal de Mediu Rural del Conceyu de Carreño, Manuel Noceda; el viceconseyeru de Mediu Ambiente, Benigno Fernández Fano; l'alcaldesa de Carreño, Amelia Fernández; el xerente de Coxersa, Santiago Fernández; y la técnica de Mediu Ambiente del Conceyu de Carreño, Laura Rodriguez

18/09/2018

El Consorciu para la Xestión de Residuos Sólidos d’Asturies (Coxersa) y el Conceyu de Carreño presentaron güei’l modelu nuevu de recoyida de residuos urbanos na capital del conceyu, onde va dexar de retirase la basura mecío dos díes a la selmana (martes y vienres), al empar qu’empieza un serviciu de reciclaxe de la materia orgánico.

El viceconseyeru de Mediu Ambiente, Benigno Fernández Fano, y l’alcaldesa del conceyu, Amelia Fernández, difundieron güei los detalles d’esta iniciativa, que yá ta vixente en Grau, y que quier demostrar que pue implantase una llinia nueva de recoyida estremada (camiones, operarios, contenedores, etc.) ensin disparar el costu del serviciu y la tasa municipal. La implicación de la ciudadanía resulta fundamental na separación n’orixe de toles fracciones reciclables: papel y cartón, envases llixeros, botes y botelles de vidru y restos orgánicos. “Con esti esfuerciu, la basura mecío o fracción restu queda reducida a una cantidá mínima”, esplicó’l viceconseyeru.

La recoyida estremada de biorresiduos, el quintu contenedor, va empezar esta mesma tarde. El cambéu acompáñase con una campaña intensa de sensibilización y formación a la que Coxersa va destinar alredor de 60.000 euros. Dende’l día 3 tán instalaos na plaza de La Baragaña y nel centru polivalente puntos d’atención ciudadana onde los educadores ambientales espliquen los pormenores del serviciu y cómo clasificar correctamente la materia orgánico.

Amás, toles viviendes de Candás (unes 3.400) recibieron un impresu informativu y los técnicos tán visitando caún de los establecimientos que xeneren grandes biorresiduos, como restaurantes o tiendes d’alimentación. Los productores especiales son precisamente ún de los públicos oxetivos principales d’esta iniciativa, polo que quier fomentase la so participación y van ufierta-yos la posibilidá d’acceder gratuitamente a calderos y contenedores especiales (d’hasta 120 llitros de capacidá y con ruedes) pa facilitar el procesu de separación.

Otra manera, dende mañana y hasta’l día 3 d’ochobre van entamase nel centru polivalente de Candás cinco sesiones formatives siguíes de talleres (reciclaxe creativu, consumu responsable, xardín vertical, etc.).

 

Ventayes económiques y ambientales

El modelu nuevu de recoyida de residuos que Coxersa ta implantando en Candás funciona en ciudaes d’Europa y n’otres comunidaes autónomes. Promueve la separación n’orixe de les refugayes por particulares y empreses y supón ventayes económiques y ambientales importantes.

El consorciu estableció por alcuerdu de la xunta de gobiernu d’avientu del 2013 la gratuidá del tratamientu de los residuos orgánicos clasificaos na planta de dixestión anaerobia (planta de biometanización). Trátase d’un incentivu económicu adicional que se traduz nel aforru de la tarifa de depósitu en vertederu, de 20,47 euros por tonelada (ensin IVA) de basura mecío na actualidá.

De izquierda a derecha: El concejal de Medio Rural del Ayuntamiento de Carreño, Manuel Noceda; el viceconsejero de Medio Ambiente, Benigno Fernández Fano; la alcaldesa de Carreño, Amelia Fernández; el gerente de Cogersa, Santiago Fernández; y, la técnica de Medio Ambiente del Ayuntamiento de Carreño, Laura Rodriguez

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies