Gobiernu del Principau d'Asturies

Asturies, muncho más cerca

Tas en

Asturias.es Temes Vivienda Ayudes Les trés alministraciones financien con 51.825 euros la ...
 

Ayudes

Les trés alministraciones financien con 51.825 euros la rehabilitación de dos viviendes p’arriendu social en Candamu

Les obres van empezar la selmana que vien y van sufragase con cargu al plan estatal prorrogáu. El Gobiernu d’Asturies apoyó l’arrendamientu de 6. 584 families con 9 millones y punxo a disposición de los conceyos 575 pisos nel 2017. La conseyera de Servicios Sociales visitó güei la residencia de mayores del conceyu, que dispón de 24 places residenciales concertaes pol Principáu

La consejera de Servicios y Derechos Sociales, Pilar Varela; la alcaldesa de Candamo, Natalia González, y el director general de Vivienda, Fermín Bravo

24/02/2018

La rehabilitación de dos viviendes p’arriendu social en Candamu va empezar la selmana que vien y va suponer una inversión de 51.825 euros (IVA incluyíu), con cargu al conveniu soscritu ente’l Gobiernu d’Asturies, el Conceyu y el Ministeriu de Fomentu nel marcu del plan estatal prorrogáu nel 2017. El conceyu sufraga’l 36,5 % del costu, mentes que’l Principáu cubre’l 33,5 % y l’Executivu central, el 30 %. Asina lo anunció güei la conseyera de Servicios y Derechos Sociales, Pilar Varela, que visitó’l conceyu xunto al director xeneral de Vivienda, Fermín Bravo; l’alcaldesa, Natalia González, y otros representantes municipales.

Los trabayos, axudicaos a una empresa local, tienen un plazu d’execución de trés meses y mediu y van suponer la reforma d’un baxocubierta en Grullos y la rehabilitación de la planta d’arriba de les escueles vieyes del llugar d’Aces, que tienen nos baxos el centru social. La vivienda resultante na capital del conceyu va cuntar con dos cuartos y una superficie útil total de 49,70 metros cuadraos. Pela so parte, el pisu d’Aces va sumar trés cuartos y 47,49 metros cuadraos útiles.

Les dos viviendes van aumentar la ufierta pública d’arriendos sociales nel conceyu, onde’l Principáu tien a disposición 30 inmuebles, y que la so ratio algama los 14,79 % por cada mil habitantes, cinco puntos percima de la media rexonal, asitiada nel 9,3 %.

 

629.258 euros p’aumentar el parque municipal d’arriendu

Varela recordó que l’actuación en Candamu ye una de les cuatro que se van financiar con cargu a la llinia del plan estatal dirixida a remocicar viviendes municipales con destín a arriendu social. Nesti marcu, ta previsto tamién l’arreglu d’otros 18 pisos en Llanera, Mieres y El Valle Baju de Peñamellera, con un presupuestu total de 629.258 euros.

L’Executivu autonómicu propunxo esta exa, nueva nel plan, al detectar la existencia de 300 inmuebles pendientes d’arreglu depués de facer un estudiu del parque públicu municipal. La subvención de les actuaciones de rehabilitación favorez, amás, el compromisu de los conceyos coles polítiques de fomentu del arriendu, porque les edificaciones nes que s’intervién tienen que se dedicar 50 años al arrendamientu.

La conseyera señaló qu’estes polítiques son prioritaries pal so departamentu, como lo demuestra l’esfuerciu presupuestariu realizáu pol Principáu, que nel 2017 destinó 9 millones n’ayudes, de les que se beneficiaron 6.584 families, toles que cumplieron los requisitos. Anque’l plan de vivienda contemplaba un presupuestu inicial de 7,3 millones pal exerciciu pasáu, l’Executivu autonómicu apurrió 1,7 más pa que nengún demandante quedare ensin sofitu económicu.

El Gobiernu d’Asturies tamién punxo a disposición de los conceyos nel 2017 un total de 575 viviendes reparaes pa la so axudicación.

Otra manera, la conseyera visitó la residencia de mayores Alcalde José Luis Fernández Grullos, un centru de titularidá municipal que dispón de 24 places concertaes col Principáu al traviés del ERA. El presupuestu autonómicu pa estos servicios xube a 369.285 euros anuales.

Anguaño, Asturies dispón de 243 places concertaes en trece residencies municipales, nes que s’inverten anualmente 7.180.659 euros. Los últimos alcuerdos soscribiéronse nel 2016 con Bual y Cabrales. 

  Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies