Gobiernu del Principau d'Asturies

Asturies, muncho más cerca

Tas en

Asturias.es Información de los Conceyos El to Conceyu Fasad y l’Ayuntamientu de Carreño prorroguen l’acuerdu pa que ...
 

El to Conceyu

Fasad y l’Ayuntamientu de Carreño prorroguen l’acuerdu pa que los usuarios de la fundación accedan a tolos servicios municipales

Como novedá, esti añu va colaborase cola biblioteca pública, va facese un taller de teatru nel centru polivalente y va intensificase l’apoyu profesional pa favorecer la integración social

De izquierda a derecha, la alcaldesa de Carreño, Amelia Fernández; la consejera de Servicios y Derechos Sociales, Pilar Varela; la directora del centro de Fasad en Carreño, Carmen Trigo, y la concejala de Servicios Sociales del concejo, Cecilia Tascón, a su llegada al centro

29/04/2019

La conseyera de Servicios y Derechos Sociales y presidenta de la Fundación Asturiana d'Atención y Protección a Persones con Discapacidáes y/o Dependencies (Fasad), Pilar Varela, y l'alcaldesa de Carreño, Amelia Fernández, roblaron güei la prórroga del conveniu que, dende 2015, permite a los usuarios del centru que la entidá xestiona en Candás participar nes actividaes culturales, tecnolóxiques y deportives qu'ufierta'l Conceyu al traviés de los sos servicios municipales.

Como novedá, al llistáu actual d'instalaciones coles que se caltién la collaboración, esti añu va sumase la Biblioteca Municipal Carlos González Posada, na que se van entamar talleres didácticos, al empar que se va facilitar el préstamu de llibros y material audiovisual. Hasta agora, los usuarios esfruten d'actividaes nel Patronatu Deportivu, el Teatru Prendes, el Centru de Dinamización Tecnolóxica Local, el Muséu Antón, la Casa de Cultura, la Oficina d'Información Xuvenil y el Centru Polivalente La Baragaña.

Coles mesmes, el nuevu alcuerdu incorpora'l desenvolvimientu d'un taller de teatru específicu nel centru polivalente y facilita mayor sofitu profesional a les persones beneficiaries, col fin d'ameyorar la integración y l'aprovechamientu de les actividaes previstes.

L'oxetivu ye promover el desenvolvimientu de les persones con discapacidá o dependencia a quien Fasad empresta sofitu nel centru asitiáu na contorna de La Baragaña, mesmo que favorecer la so participación na vida del conceyu.

L'equipamientu cunta con un centru de sofitu a la integración nel que s'atiende anguaño a 20 persones. Trátase d'un recursu especializáu, con programes personalizaos d'atención integral y formación p’adultos de 18 a 50 años con discapacidá. Tamién dispón d'un centru de día, onde ufierta asistencia diurna a mayores en situación de dependencia, concretamente a 18 usuarios nestos momentos.



Fundación Fasad

Fasad ye una entidá ensin ánimu d'arriquecimientu, dependiente de la Conseyería de Servicios y Derechos Sociales, qu'atiende a más de mil persones. Xestiona cinco centros de sofitu a la integración: L’Arboleya, en Meres (Siero); Villalegre (Avilés), Les Arriondes, Candás y Navia; dos centros de día pa persones mayores en Candás y Navia, y otros dos pa mayores con discapacidá intelectual nel Fundoma (Uviéu) y Riañu (Llangréu).

Otramiente, encárgase de cinco recursos d'agospiamientu: la Unidá Residencial de Meres (Siero); el Centru d'Atención a la Dependencia de Turón (Mieres); la Unidá Residencial de Cangas, una vivienda tutelada pa persones con discapacidá intelectual n'Avilés y un agospiamientu tutelar nel Fundoma.

Ente los llabores de la entidá figura la supervisión, xunto cola Conseyería de Sanidá, de les viviendes destinaes a persones con enfermedá mental en distintes zones d'Asturies.

Amás, desenvuelve diversos programes de sofitu, como'l residencial p'afectaos por trestornos mentales graves n'Uviéu; el d’estimulación nel mediu acuáticu pa menores de 0 a 3 años, en collaboración coles Unidaes d'Atención Infantil Temprana, y el proyectu Mañana, tamién, de sofitu a padres mayores de 60 años que tienen fíos discapacitaos al so cargu.

Per otru llau, realiza'l siguimientu de 469 personesincapacitaes xudicialmente, función que tien encamentada pola Alministración autonómica y que lleva a cabu acordies col decretu 21/2006, de 2 de marzu, que regula la constitución y el funcionamientu de la Comisión de Tuteles del Principáu.

 

Información sobre el documento

© Copyright 2006. Gobiernu del Principau d'Asturies