Gobiernu del Principau d'Asturies

Asturies, muncho más cerca

Tas en

Asturias.es El conseyu rector del Serviciu Públicu d'Empléu propón por ...
 

Aniciu

El conseyu rector del Serviciu Públicu d'Empléu propón por unanimidá a Pilar Varela como directora xerente nueva

La esconseyera de Servicios y Derechos Sociales va coordinar les polítiques actives y los programes de reducción del paru. Eva Pando va siguir al frente del Institutu de Desenvolvimientu Económicu del Principáu

18/09/2019

El conseyu rector del Serviciu Públicu d'Empléu del Principáu d'Asturies (Sepepa) propunxo güei por unanimidá'l nomamientu de Pilar Varela Díaz como directora xerente nueva del organismu autónomu, adscritu a la Conseyería d'Industria, Empléu y Promoción Económica.

Nacida nel barriu avilesín de Llaranes en 1960, ye diplomada en Maxisteriu y Llicenciada en Pedagoxía pola Universidá d'Uviéu. Ente 1987 y 1992 desenvolvió delles xeres pa la Comisión Europea n’ámbitu de los programes d'empléu pa xente mozo y, darréu, ente 1992 y 1999, foi directora de Formación na Ciudá Industrial Valle del Nalón (Valnalón). Ente 1999 y 2003 formó parte del equipu de gobiernu del Conceyu d'Avilés y ocupó les conceyalíes de Facienda y Polítiques Actives d'Empléu y Facienda y Promoción Económica. Tamién participó na comisión executiva de la Fundación del Metal d'Asturies.

Foi alcaldesa d'Avilés del 2007 al 2015, añu nel que foi nomada conseyera de Servicios y Derechos Sociales del Gobiernu d'Asturies, cargo qu'ocupó hasta xunetu pasáu.

El conseyu rector del Sepepa, nel que participen el Principáu, los sindicatos UXT y CC. OO. y la Federación Asturiana d'Empresarios (Fade), destacó de Pilar Varela el so perfil profesional, la so esperiencia y capacidá de xestión, asina como la so conocencia de la realidá sociollaboral y económica del Principáu.

Amás, tanto'l conseyu rector como'l conseyeru d'Industria, Empléu y Promoción Económica y presidente del Sepepa, Enrique Fernández, estimó a l'hasta agora directora del Sepepa, Luisa Pérez, el trabayu desenvueltu nel organismu mientres los cuatro años últimos.

Ente les funciones del Sepepa atópase la ellaboración y puesta en marcha de programes y acciones pal empléu; en concreto, los relativos a polítiques actives y fomentu de la inserción de los paraos; la prospección y análisis del mercáu de trabayu, la Intermediación llaboral y el rexistru de demandantes, la xestión de les ufiertes d'empléu y la orientación.



Continuidá nel Idepa

Otra manera, el conseyu rector del Institutu de Desenvolvimientu Económicu del Principáu (Idepa) ratificó a Eva Pando como directora xeneral, responsabilidá qu'ocupaba dende’l 2015.

Eva Pando ye inxeniera Industrial pola Universidá d'Uviéu y MBA pola Universidá Politécnica de Madrid. Dende xineru del 2005 hasta setiembre del 2015 desenvolvió la so carrera profesional nel Centru Européu d'Empreses y Innovación (CEEI) en calidá de directora.

 

Información sobre el documento

© Copyright 2006. Gobiernu del Principau d'Asturies