Gobierno del Principado de Asturias

Asturias, mucho más cerca

Estás en

Aniciu Temes Tresportes y Movilidá El Gobiernu d’Asturies entaína cola convocatoria d’ayudes del ...
 

Tresportes y Movilidá

El Gobiernu d’Asturies entaína cola convocatoria d’ayudes del Programa Moves II pa impulsar la movilidá sostenible

La Conseyería d’Industria va publicar nes selmanes vinientes la llinia de subvenciones, con un presupuestu de 2,17 millones, el doble que l’añu pasáu. El Principáu ye la comunidá autónoma con mayor índiz de puntos de recarga eléctrica y de carga rápida y la quinta en penetración del vehículu eléctricu

05/07/2020

La Conseyería d’Industria, Empléu y Promoción Económica va publicar nes selmanes vinientes la llinia d’ayudes del Programa Moves II, cola mira d’impulsar y promover la movilidá sostenible.

El presupuestu pa esta convocatoria va xubir a 2.177.821 euros, más del doble que l’añu pasáu, y la conseyería va procurar que bona parte de les ayudes puedan concedese yá nesti exerciciu. Como novedá d’esta edición, el mayor porcentaxe del presupuestu va destinase a sofitar l’adquisición de vehículos de combustibles alternativos (eléctricos, híbridos enchufables, gas y hidróxenu).

El 16 de xunu publicaron les bases del MOVES II , que’l Principáu yá dio a conocer al sector esta selmana, nuna sesión telemática entamada pola Asociación Empresarial pal Desenvolvimientu y Impulsu del Vehículu Eléctricu (Aedive), na qu’intervieno’l director xeneral del Institutu pa la Diversificación y Aforru de la Enerxía (IDEA), Joan Groizard; la directora xeneral d’Enerxía, Minería y Reactivación, Belarmina Díaz Aguado; representantes de la Fundación Asturiana de la Enerxía (Faen) y de la mesa de movilidá rexonal. Tamién participaron les dos empreses rexonales de movilidá compartida eléctrica, GUPPY y HI Mobility, representantes d’Efibat, Iberdrola, Endesa y Phoenix Contact.

Nesta segunda edición, la iniciativa arriquecióse con propuestes feches poles comunidaes autónomes, ente elles Asturies:

  • El plazu de presentación d’ayudes va ser d’un añu dende la publicación de la convocatoria.
  • L’achatarramientu d’un vehículu dexa de ser obligatoriu, anque l’ayuda ye mayor que cuando nun s’achatarra. Pídese ITV vixente en fecha de declaración d’estáu d’alarma pa nun perxudicar a quien tengan dificultaes en pasar la inspección.
  • Va ser subvencionable l’adquisición de vehículos eléctricos y de pila de combustible de la categoría M1 y N1 con hasta 9 meses d’antigüedá (vehículos demo o vehículos km cero), cuntada dende la so primer matriculación hasta la fecha de rexistru de la solicitú d’ayuda, y que la so titularidá tendrá qu’ostentala’l concesionariu, puntu de venta o fabricante/importador que realice la venta del vehículu al destinatariu postreru de l’ayuda. El vehículu ha adquirise pol concesionariu o puntu de venta como vehículu nuevu al fabricante o importador.
  • Son elixibles les adquisiciones de vehículos por renting. Pue xestionase con concesionarios como entidaes collaboradores
  • La convocatoria d’ayudes tien efectu incentivador, polo que toles actuaciones han realizase en fecha posterior a la solicitú d’ayuda, sacante les adquisiciones de motos (L3), turismos (M1) y furgonetes llixeres (N1). Esto ye, yá pue mercase un vehículu llixeru subvencionable y solicitar l’ayuda cuando la Dirección Xeneral d’Enerxía, Minería y Reactivación publique la convocatoria.

El Moves ye un programa del Institutu pa la Diversificación y Aforru de la Enerxía (IDAE), organismu adscritu al Ministeriu pa la Transición Ecolóxica (MITECO) al traviés de la Secretaría d’Estáu d’Enerxía. La iniciativa, que cunta anguaño con un presupuestu de 100 millones d’euros frente a los 45 millones del 2019, diríxese a incentivar la compra de vehículos alternativos y la instalación d’infraestructures de recarga de vehículos eléctricos, a la promoción de sistemes d’empréstamos de bicicletes eléctriques, y a la implantación de midíes recoyíes en Planes de Tresporte a los centros de Trabayu.

A esta llinia de sofitu, súmense n’Asturies les de la Dirección Xeneral d’Enerxía, Minería y Reactivación pal usu d’enerxía anovable y eficiencia enerxética, que se van convocar d’equí a poco y van dexar complementar ayudes en furgonetes eléctriques, n’instalación de puntos de recarga eléctricos y n’estaciones de repostaxe de combustibles alternativos (gasineres).



Balance Moves I

El Principáu executó l’añu pasáu toles ayudes y el presupuestu asignáu, de 1.000.022 euros. Pente medies de dos resoluciones, concediéronse 96 solicitúes de les 197 presentaes. Les demás (101) nun s’atendieron por falta de fondos, por superar el tope d’ayuda de 100.000 euros por solicitante, por nun cumplir los requisitos recoyíos nes bases o por nun presentar documentación esencial pa la resolución de la subvención a pesar de riquilo.

Pa l’adquisición de vehículos d’enerxía alternativo, concediéronse 20 solicitúes por un total de 280.250 euros correspondientes a 11 camiones de GNL (gas natural licuao), 14 furgonetes eléctriques, 6 vehículos eléctricos y 7 motos eléctriques.

Pa la Implantación d’infraestructures de recarga de vehículos eléctricos, diéronse ayudes por valor de 622.437 euros que dexaron subvencionar 125 puntos de recarga eléctrica: 2 de carga vinculada (menos de 7 kW), 68 convencionales, d’hasta 15 kW; 16 puntos d’hasta 40 kW, semi-rápidos y 39 puntos rápidos, de más de 40 kW.

Les ayudes incluyeron tamién la concesión de dos solicitúes por importe de 97.335 euros pa empréstamos de bicicletes eléctriques.

Asturies ye líder nacional en movilidá eléctrica: la primer rexón en númberu de puntos de recarga eléctrica, la quinta en penetración del vehículu eléctricu y la primera en carga rápida. La movilidá sostenible impúlsase dende la mesa rexonal d’impulsu al vehículu eléctricu y la mesa rexonal pal fomentu del GNV (Gas Natural Vehicular).


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobierno del Principado de Asturias