Gobiernu del Principau d'Asturies

Asturies, muncho más cerca

Tas en

Asturias.es Ciencia impulsa una Oficina de Tresferencia de Conocimientu pa ...
 

Aniciu

Ciencia impulsa una Oficina de Tresferencia de Conocimientu pa treslladar al mercáu los resultaos de la investigación n’Asturies

El Centru Européu d’Empreses y Innovación (CEEI) va encargase de guiar tol procesu y orientar a les entidaes. El conseyeru Borja Sánchez enfótase n’aumentar el númberu d’empreses derivaes (spin-off) y de base tecnolóxica nel texíu productivo. El Premiu Radar pa fomentar la iniciativa entamadora va cuntar anguaño con una dotación especial de 18.000 euros

Izda y arriba:Íñigo Felgueroso,Dtor Gte CT Idonial;Lander Rubio, Promotor Área Financiación CaixaBank;Alma Menéndez, Socia Despacho Garrigues y Pablo Priesca,Dtor Gral CTIC;Ángel Oliveros,Dtor Zona Asturias BBVA;José Antonio Maira, Coordinador Abanca Asturias,León y Lugo;Rafael González,Dtor Dpto Empresas Caja Rural;Ángeles Gómez Borrego,Delegada CSIC Asturias;Cristina Fanjul, Dtora CEEI;Santiago García Granda,Rector Universidad Oviedo, y Borja Sánchez,Consejero Ciencia

14/09/2020

El Gobiernu d’Asturies va poner en marcha una Oficina de Tresferencia de Conocimientu pa treslladar al mercáu los resultaos de la investigación que se realiza nel Principáu. El conseyeru de Ciencia, Innovación y Universidá, Borja Sánchez, presentó güei la iniciativa, que va tener l’orixe nel Centru Européu d’Empreses y Innovación (CEEI), y que busca aumentar el númberu d’empreses de base tecnolóxica (EBT), de filiales (spin-off) procedentes del ecosistema investigador y de pymes innovadores.

El CEEI, un organismu con trayectoria llarga nel asesoramientu de pymes y d’investigadores que quieren convertir los sos proyectos n’idees empresariales, va encargase d’asesorar y emponer esta tresferencia poles entidaes xeneradores de conocimientu. La Universidá d’Uviéu, centros d’investigación y centros tecnolóxicos van ser los primeros beneficiarios, anque tamién van poder recurrir a esta oficina firmes pequeñes que nun tienen capacidá de tresferir conocimientu elles soles.

Sánchez indicó qu’ún de los oxetivos de la oficina ye aumentar la innovación empresarial y averar la ciencia básica a la sociedá al traviés de spin-off, de forma que munchos proyectos d’investigación qu’agora queden nos llaboratorios puedan tener una aplicación práctica de la que pueda beneficiase la ciudadanía.

Asturies cunta anguaño con 208 empreses de base tecnolóxica y llogra ún de los niveles de supervivencia más altos del país: el 80 % d’estes compañíes pequeñes caltiénense actives depués de cinco años.

Al respective de les spin-off -iniciatives empresariales que tienen l’orixe n’ámbitu de la investigación-, anguaño hai 40 constituyíes nel Principáu, principalmente nos sectores de la biotecnoloxía y dixital. Les más d’elles (65 %) proceden del ámbitu académicu y tecnolóxicu, mentes qu’un 35 % creóse nel mundu empresarial.



Premiu Radar spin-off

El Premiu Radar spin-off, qu’anguaño va tener una edición especial, creóse precisamente coles mires de fomentar la iniciativa entamadora ente investigadores. Asina, el CEEI convoca esti gallardón como sofitu a la tresferencia al mercáu de la ciencia y el conocimientu que surden de los proyectos d’investigación.

Como novedá, la dotación del premiu aumenta nesta ocasión de 2.000 a 18.000 euros, gracies al sofitu de los patrocinadores y collaboradores: Institutu de Desenvolvimientu Económicu del Principáu (Idepa), Abanca, BancoSabadell, BBVA, Caixabank, Caja Rural, Liberbank, Fundación Idonial, Fundación CTIC, Garrigues, la Universidá d’Uviéu y el Conseyu Superior d’Investigaciones Científiques (CSIC), amás de la Conseyería de Ciencia. Esta edición va cuntar tamién cola posibilidá d’otorgar una mención a proyectos que xeneren soluciones o tengan un impactu positivu na xestión de la covid-19.

El premiu diríxese a investigadores que desenvuelven l’actividá profesional en centros tecnolóxicos asturianos públicos y privaos. El plazu pa presentar candidatures va tar abiertu hasta les 14 hores del vienres 16 d’ochobre.

Nes sos cinco ediciones anteriores, recibiéronse 43 candidatures de 10 entidaes, nes que participaben 139 investigadores.


Icono gráfico alusivo al tipo de archivo Audiu (Audiu: 757 Kb) (n'español)

Información sobre el documento

© Copyright 2006. Gobiernu del Principau d'Asturies