Gobiernu del Principau d'Asturies

Asturies, muncho más cerca

Tas en

Asturias.es Temes Ganadería El Principáu convoca ayudes pa l’alquisición de dispositivos de ...
 

Ganadería

El Principáu convoca ayudes pa l’alquisición de dispositivos de localización y monitorización del ganáu

Les subvenciones van beneficiar a esplotaciones de bovín, ovín, caprín y equín n'estensivo, col fin de facilitar el so trabayu ya incrementar la rentabilidá. L'aplicación d'esta tecnoloxía permite disponer d'información sobre l'allugamientu exactu de les reses, los sos movimientos y estáu

23/05/2019

La Conseyería de Desenvolvimientu Rural y Recursos Naturales publica güei nel Boletín Oficial del Principáu (Bopa) la convocatoria d'ayudes para l'alquisición de dispositivos de localización y monitorización del ganáu, dotada con 100.000 euros. Estes tecnoloxíes permiten a los titulares de les esplotaciones disponer d'información sobre l'allugamientu exactu de les reses, los sos movimientos y estáu. El plazu de presentación de solicitúes ye de 20 díes dende mañana, vienres.

Les ayudes destinaes a esplotaciones de bovín, ovín, caprín o equín que realicen un aprovechamientu ganaderu estensivu autorizáu. La so finalidá ye la meyora de la rentabilidá d'estos negocios por aciu l'aplicación de les meyores tecnolóxiques, pa collaborar asina na modernización y desenvolvimientu del sector agrariu. L'oxetivu principal ye contribuyir a la competitividá del sector y ameyorar el siguimientu y desenvolvimientu de les polítiques de l'Alministración autonómica.

La cuantía de la subvención pa la compara de los GPS va ser de 100 euros por cada dispositivu que cumpla los siguientes requisitos: monitorización de la posición de los animales les 24 hores del día y del nivel d'actividá de los animales, recoyida de la temperatura superficial del animal, batería con duración mínima de 6 meses y, siquier, dos años de garantía. L'importe máximu de l'ayuda asítiase en 1.000 euros por esplotación.

P'aportar a les subvenciones ye mester disponer de más de 10 femes reproductores pa esplotaciones de bovín y equín, y más de 50 pa ovín y caprín

El desenvolvimientu de les tecnoloxíes de la información y les comunicaciones impulsa tamién meyores nel sector agrariu. Estos dispositivos ayuden a la xestión diaria de les esplotaciones, facilitando a los ganaderos conocer en tou momentu la localización y movimientu de los sos animales, el so estáu sanitariu y la so actividá, colo que s'amenorga'l númberu de baxes y ameyora la rentabilidá de les empreses.

Amás, la información qu'ufierten resulta relevante pa l'Alministración, cuantimás aquella rellacionada cola localización de los animales nes camperes, al permitir el desenvolvimientu y siguimientu de les polítiques agraries y un mayor control énte eventuales problemes de sanidá animal.

 

Información sobre el documento

© Copyright 2006. Gobiernu del Principau d'Asturies