Gobiernu del Principau d'Asturies

Asturies, muncho más cerca

Tas en

Asturias.es La investigación y la tecnoloxía al serviciu de la humanidá ...
 

Aniciu

La investigación y la tecnoloxía al serviciu de la humanidá protagonicen los actos divulgativos del Día de les Ciencies Asturianes

La octava edición de la convocatoria celébrase con una conferencia del rector de la Universidá d’Uviéu, Santiago García, y una charla a cargu d’Amador Menéndez Velázquez

07/11/2018

La Conseyería d’Educación y Cultura celebra la octava edición del Día de les Ciencies Asturianes con dos actividaes divulgatives centraes na investigación y la tecnoloxía al serviciu de la humanidá.

Per una parte, el rector de la Universidá d'Uviéu, Santiago García Granda, va impartir mañana la conferencia Notes sobre la investigación na Universidá d’Uviéu, nel salón d'actos del Muséu Arqueolóxicu d'Asturies, a les 19:30 hores. La so intervención va centrase nel llabor de la institución académica, onde alredor de dos mil investigadores desenvuelven el 80 % de la I+D+i de la comunidá.

Per otru llau, el científicu Amador Menéndez Velázquez va dar una charla divulgativa a escolinos esti vienres, 9 de payares, a les 12:00 hores, na Casa la Cultura de La Pola Llaviana. Col títulu Tecnoloxía al serviciu de la humanidá, va presentar les posibilidaes qu'ufierta la tecnoloxía a la hora d'encarar dalgunos de los retos más importantes de la sociedá actual. Menéndez ye doctor en Química pola Universidá d'Uviéu y trabaya anguaño nel Institutu Tecnolóxicu de Materiales d'Asturies (ITMA), depués de pasar pel Conseyu Superior d'Investigaciones Científiques, el Llaboratoriu Européu de Radicación de Sincrotón, el Centru d'Investigación en Nanomateriales y Nanotecnoloxía (CINN) y l'Institutu Tecnolóxicu de Massachusetts (MIT), ente otros.

El Día de les Ciencies Asturianes coincide cola celebración nesti mes del Día Mundial de la Ciencia pa la Paz y el Desarrollu. Esta cita ufierta la posibilidá d'amosar la importancia de la ciencia na vida diaria y favorecer el debate. El tema d'anguaño ye La ciencia, un derechu humanu, porque nel 2018 conmemórase'l 70.u aniversariu de la proclamación de la Declaración Universal de los Derechos Humanos.

 

 

Información sobre el documento

© Copyright 2006. Gobiernu del Principau d'Asturies