Gobiernu del Principau d'Asturies

Asturies, muncho más cerca

Tas en

Asturias.es L’Idepa va destinar 778.169 euros a 94 proyectos pa favorecer el ...
 

Aniciu

L’Idepa va destinar 778.169 euros a 94 proyectos pa favorecer el desenvolvimientu internacional de les empreses asturianes

L’Institutu de Desenvolvimientu Económicu va sofitar económicamente a les compañíes pa participar en feries, financiar consultoríes y contratar técnicos en comerciu esterior

19/11/2020

L'Institutu de Desenvolvimientu Económicu del Principáu (Idepa) aprobó 94 proyectos que se van beneficiar de 778.169 euros correspondientes a la convocatoria d'ayudes para sofitar la promoción internacional y la diversificación de mercaos de les empreses. En total, presentáronse 122 iniciatives.

L'oxetivu ye favorecer l'afitamientu y el crecimientu de les firmes asturianes, a les que se-yos financien acciones de promoción esterior col fin d'aumentar les sos esportaciones o diversificar los mercaos destín de los sos productos o servicios.

La convocatoria consta de cuatro programes: el PINT, de proyectos individuales a la promoción internacional; el COOPERA, d'iniciatives de promoción internacional en cooperación; el BREXIT, rellacionáu con proyectos de nuevos mercaos pa empreses afectaes pola salida del Reinu Uníu de la UE; y el programa TCEX, pa la contratación de técnicos de comerciu esterior.

Los 94 proyectos aprobaos suponen una inversión de 1,9 millones d'euros. La llinia PINT axunta'l mayor númberu d'iniciatives aprobaes, 90. Pue destacase, igualmente, que 31 de los beneficiarios son microempreses, 51 pymes y 11 medianes empreses.

Ente los conceptos subvencionables, atópense páxines web, material promocional, feries, eventos promocionales, viaxes comerciales, llicitaciones internacionales, publicidá, consultoría, xestión y la contratación de personal como técnicos de comerciu esterior.

En comparanza col añu pasáu, esti 2020 recibiéronse un 26,5% solitúes menos por cuenta de les llimitaciones de movimientu de resultes de la pandemia. Sicasí, los resultaos amuesen la voluntá de les empreses pa caltener la so actividá internacional magar la situación de crisis y a les llimitaciones d'accesu a los mercaos esteriores.

Información sobre el documento

© Copyright 2006. Gobiernu del Principau d'Asturies