Gobiernu del Principau d'Asturies

Asturies, muncho más cerca

Tas en

Asturias.es Temes Industria y enerxía La comisión mista finaliza los sos trabayos con 17 ...
 

Industria y enerxía

La comisión mista finaliza los sos trabayos con 17 recomendaciones p’afrontar la transición enerxética n’Asturies

Plantégase definir una estratexa rexonal hasta 2030 para fomentar la enerxía eólica terrestre y marítima y caltener la competitividá de les industries electrointensives. El documentu identifica 20 actividaes emerxentes, ente elles l'almacenamientu enerxéticu y l'hidróxenu, la movilidá eléctrica y les redes intelixentes acomuñaes a les TIC. El Gobiernu d'Asturies cumple los plazos comprometíos y presenta una fueya de ruta pa encarar la descarbonización de la economía

14/07/2020

La Comisión Mista para evaluar l'Impactu de la Transición Enerxética n'Asturies celebró güei n'Uviéu la so séptima xunta na que se presentó'l documentu definitivu, qu'analiza los impactos del procesu de descarbonización na economía rexonal ya identifica los riesgos, oportunidaes y escenarios qu'a curtiu y mediu plazu van acarretar los compromisos de neutralidá climática asumíos pola Unión Europea y reflexaos nel Plan Nacional Integráu d'Enerxía y Clima (PNIEC).

El documentu sintetiza los resultaos de los trabayos realizaos dende ochobre por más de 50 espertos de distintos sectores que s'entamaron en cinco meses y celebraron una trentena de xuntes. D'esta manera, el Gobiernu d'Asturies cumple col compromisu de presentar los resultaos nos plazos anunciaos, magar la paralización temporal de los trabayos pola crisis sanitaria.

La comisión mista púnxose en marcha'l 14 d'ochobre de 2019 como órganu plural d'analís y consulta nel que participaron representantes del Principáu, los axentes sociales y económicos y la Federación Asturiana de Conceyos (FACC).

El documentu presentáu güei aborda los efectos de la transición enerxética hasta 2030 nes principales actividaes económiques (enerxía, industria, tresportes, residencial, servicios ya institucional, ganadería y agroforestal, y sector ambiental). Coles mesmes, identifica les oportunidaes en sectores emerxentes y plantega 17 encamientos pa encarar la descarbonización de la economía.

Les actividaes enerxétiques ya industriales van ser les más afectaes pol zarru de centrales de xeneración eléctrica y de les dificultaes a les que s'enfrenten les empreses p'adaptase a les esixencies enerxétiques y medioambientales nun mercáu global bien competitivu.

Nesi contestu, la Estratexa de Transición Xusta plantegada coles mires de promover los aspectos social y llaboral acomuñaos a la descarbonización, considérase “vital” pa los intereses d'Asturies. “Poro”, añede'l documentu, “ye imprescindible que se tengan en cuenta les singularidaes del sector enerxéticu asturianu y de la estructura de consumu rexonal de los distintos sectores d'actividá”, mesmo que “la transición enerxética a abordar seya xusta y atienda a les característiques específiques de los territorios”.


Oportunidaes y encamientos

Énte esti escenariu, identifíquense venti sectores y actividaes emerxentes, ente elles:

  • Les enerxíes anovables y residuales.
  • Los sistemes d'almacenamientu enerxéticu pa redes eléctriques
  • Actividaes na cadena de valor industrial del sector enerxéticu
  • La minería sostenible.
  • El desenvolvimientu de materiales avanzaos y sostenibles; la innovación na producción y tresformamientu del aceru (Polu del Aceru).
  • L'aprovechamientu del hidróxenu.
  • La dixitalización.
  • Redes intelixentes acomuñaes a TIC ya industria 4.0.
  • La movilidá sostenible, la eficiencia enerxética n'edificación y el desenvolvimientu de les actividaes forestales.

L'informe establez 17 encamientos d'actuación, nueve d'ellos nun bloque específicu rellacionáu con enerxía, y el restu tresversales con una orientación más xeneralista.

Tocantes a les específiques, destaquen les siguientes:

  • La ellaboración d'una Estratexa Enerxética a 2030 col horizonte de descarbonización a 2050 pa identificar el meyor modelu enerxéticu pa la rexón.
  • L'impulsu al usu de los recursos enerxéticos existentes y de proyectos eólicos terrestres y marítimos, el biogás, l'hidróxenu, la biomasa forestal y les instalaciones pal usu d'enerxíes residuales.
  • La promoción d'un modelu enerxéticu basáu na diversificación tecnolóxica, nel que figuren los nuevos sistemes d'almacenamientu, la hibridación de tecnoloxíes, la rehabilitación enerxética d'edificios y la movilidá eléctrica.
  • El caltenimientu de los recursos actuales y les instalaciones existentes como les centrales minihidráulicas y les de cogeneración.
  • La reconocencia de les singularidaes de el consumidores electrointensivos, la compensación de costos indirectos de CO2 y l'establecimientu d'un axuste en frontera pa penalizar les importaciones de países que nun tengan les esixencies medioambientales de la UE. Tamién se plantega l'autorización alministrativa definitiva pa la regasificadora d'El Musel.
  • La puesta en valor d'infraestructures, como la regasificadora, l'aseguramientu de la calidá y del suministru d'eletricidá.
  • L'aprovechamientu de la esperiencia minera ya industrial.
  • La transición enerxética como aceleradora d'actividá, empléu ya innovación na fabricación aditiva, la movilidá sostenible, l'usu del CO2, el fomentu del autoconsumo y l'eficiencia enerxética, y n'actividaes ganaderes y agroforestales.
  • L'impulsu de sinergias n'actividaes enerxétiques y medioambientales.

Al respective de los encamientos tresversales, propónse, por casu, el fomentu de la I+D+i, l'impulsu de les tecnoloxíes locales y la promoción de les cadenes de producción d'orixe rexonal y de la economía circular. El documentu tamién aboga pol reciclaje formativu y de nuevos perfiles profesionales y la collaboración públicu-privada pa la defensa rexonal d'oxetivos enerxéticos.

El conseyeru d'Industria, Empléu y Promoción Economía, Enrique Fernández, calificó de “rigorosu y realista” l'analís realizáu al alvertir de les debilidaes y riesgos del procesu de descarbonización ya identificar les oportunidaes y fortaleces coles que cunta'l Principáu p’abordar la transición enerxética, un procesu inevitable que rique de la implicación del conxuntu de la ciudadanía y d'amplios niveles de consensu social, políticu y empresarial”.

El documentu aprobáu güei va unviase a toles entidaes que participaron na Comisión Mista y nes cinco meses rexonales. Amás, a partir de mañana va abrise un periodu de consultes de siete díes hábiles ente entidaes y organizaciones afectaes pol procesu pa que realicen aportaciones y suxerencies al conteníu del informe. El documentu ta disponible na páxina web de la Fundación Asturiana de la Enerxía (FAEN).

Información sobre el documento

© Copyright 2006. Gobiernu del Principau d'Asturies