Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Sanidá Vexetal El Gobiernu d’Asturies pon en marcha’l plan pal control y ...
 

Sanidá Vexetal

El Gobiernu d’Asturies pon en marcha’l plan pal control y erradicación del plumeru de la Pampa

El conseyeru de Mediu Ambiente asistió güei en Cuaña a la primer intervención pa desaniciar la Cortaderia selloana. La empresa Tragsa asume los trabayos, a los que se van destinar 440. 000 euros anguaño. Les zones más afectaes por esta especie invasora son veres d’autopistes y víes de tren, polígonos, árees periurbanes, rellenos de canteres, terrenos portuarios y vertederos

De izquierda a derecha, Manuel Diez de la empresa Tragsa; Joaquín Moya gerente de Tragsa; Tomás Emilio Díaz catedrático de Botánica de la Universidad de Oviedo; el consejero de Infraestructuras, Ordenación del Territorio y Medio Ambiente, Fernando Lastra; y el viceconsejero de Medio Ambiente, Benigno Fernández Fano

12/07/2018

El conseyeru d’Infraestructures, Ordenación del Territoriu y Mediu Ambiente, Fernando Lastra, asistió güei a la puesta en marcha del plan d’acción pal control y erradicación de la Cortaderia selloana, conocida popularmente como plumeru o yerba de la Pampa.

Lastra foi a Cuaña a la primer intervención programada pa desaniciar esta especie, xunto al viceconseyeru de Mediu Ambiente, Benigno Fernández Fano; l’alcalde del conceyu, Salvador Méndez, y responsables de Tragsa, empresa encargada d’executar les midíes. Pa empezar les actuaciones escoyóse una finca particular averada al ríu Navia, daqué que, a xuiciu del conseyeru, “pon de manifiestu la necesidá de que la sociedá civil s’implique na erradicación”.

El Principáu encargó a Tragsa la execución del plan d’acción contra’l plumeru de la pampa, por un importe de 440.000 euros p’anguaño, cola mira de desaniciar exemplares y consolidar los terrenos lliberaos pa evitar que los vuelvan invadir otra vez.

La Cortaderia selloana ta considerada una de les especies de flora invasora más peligroses pol so grau d’espansión y l’impactu económicu y ambiental que xenera. Les zones más afectaes n’Asturies son veres d’autopistes y víes de tren, los polígonos industriales, les árees periurbanes, los rellenos de canteres, los terrenes portuarios y los vertederos. Nos últimos años detectóse una medría rápida de la densidá y distribución de la Cortadera, que’l so principal vector de dispersión na comunidá ye l’autopista A-8.

Les actuaciones previstes sofítense nel Protocolu d’actuación contra’l plumeru n’Asturies, ellaboráu en collaboración col Departamentu de Botánica de la Universidá d’Uviéu, qu’ufierta una visión estratéxica pa planiar la prevención, control y posible erradicación de la especie. Esti documentu, que cuntó cola participación de Tomás Díaz, catedráticu de Botánica de la institución académica, detalla les intervenciones que tienen que llevase a cabu según les condiciones de cada mediu, garantizando asina una mayor efectividá y el menor costu ambiental.

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies