Gobiernu del Principau d'Asturies

Asturies, muncho más cerca

Tas en

Asturias.es El Principáu desarrolla una web pa informar en tiempu real sobre ...
 

Aniciu

El Principáu desarrolla una web pa informar en tiempu real sobre la ocupación de les playes asturianes

La ferramienta utiliza una tecnoloxía basada na intelixencia artificial aplicada a la reconocencia d'imáxenes de cámares instalaes nos arenales. Los conceyos van poder utilizar los datos recoyíos pa tomar midíes en casu d'escesu d'arribación

28/07/2020

El Principáu desenvolvió la web https://playas.asturias.es qu'ufierta información en tiempu real sobre la ocupación de les playes asturianes y apurre datos sobre l’estáu de les marees, lo que va facilitar la toma de decisiones de conceyos y usuarios particulares pa evitar aglomeraciones.

L'oxetivu d'esta iniciativa ye ufiertar un mecanismu d'ayuda pa regular la ocupación de los arenales y evitar escesu d'aforu, de manera que la ciudadanía pueda esfrutar del branu con mayor seguridá. Amás, la web ufierta detalles sobre la variedá y riqueza de la contorna mariñana con semeyes y datos descriptivos de cada sablera.

La Dirección Xeneral de Seguridá y Estratexa Dixital foi la encargada de desenvolver esta ferramienta, en collaboración cola Dirección Xeneral d'Alministración Local, y con financiación de la Viceconseyería de Turismu.

Los datos recoyíos van sirvir a los conceyos pa poder tomar midíes énte posibles escesos d'arribación, mesmo que pa informar a los visitantes del estáu de les sableres. D'esta miente, podrán evitase los arenales más concurríos.

Esta nueva páxina inclúi tamién un apartáu pa la recoyida d'información y xenera un repositoriu de los datos rexistraos: ocupación, datos meteorolóxicos agrupaos nes estaciones de cada zona, temperatures, hores de sol, precipitaciones o velocidá del vientu. Amás, los usuarios van poder introducir feches pa facer los sos propios analises temporales. Estos detalles resulten d'utilidá pa posibles decisiones nel futuru y sirve como exemplu de la estratexa de open data que fomenta'l Principáu.

El desenvolvimientu tecnolóxicu básase na intelixencia artificial aplicada a la reconocencia d'imáxenes. Por aciu técniques de visión artificial desenvueltes pola empresa asturiana TacticaTic, identifícase'l nivel d'ocupación en cada momentu al traviés d'imáxenes recoyíes por aciu cámares web.

Toos estos datos van ser almacenaos y trataos en servidores del Gobiernu d'Asturies, cumpliendo asina escrupulosamente col Esquema Nacional de Seguridá y el Reglamentu Xeneral de Protección de Datos.

Hasta agora, na web incluyéronse aquelles playes que cunten con salvamentu y cámares que permiten rexistrar imáxenes Sicasí, p'ameyorar la calidá y la cantidá de la información algamóse un alcuerdu cola Federación Asturiana de Conceyos (FACC) pa que los conceyos doten a los arenales de les infraestructures necesaries pa la recoyida d'imáxenes.

Información sobre el documento

© Copyright 2006. Gobiernu del Principau d'Asturies