Gobiernu del Principau d'Asturies

Asturies, muncho más cerca

Tas en

Asturias.es Temes Emplegu El paru menguó en 4.600 persones n'Asturies mientres el segundu ...
 

Emplegu

El paru menguó en 4.600 persones n'Asturies mientres el segundu trimestre del añu, según la EPA

El Gobiernu d'Asturies llama l'atención sobre'l contraste ente los cálculos de la Encuesta de Población y los datos de paru rexistráu, muncho más favorables

25/07/2019

La Encuesta de Población Activa (EPA) correspondiente al segundu trimestre del añu, publicada güei pol Institutu Nacional d'Estadística (INE), indica una baxada del paru de 4.600 persones n'Asturies, un 6,8 % menos que nos trés primeros meses del añu. L'estudiu reflexa que la ocupación baxa en 700 persones, un 0,18 %, hasta asitiase en 384.700 persones.

Estos datos, qu'indiquen una evolución desfavorable tocantes a la ocupación, evidencien una vegada más que la metodoloxía de trabayu de la EPA provoca variaciones grandes ente trimestres que nun se correspuenden cola realidá del mercáu llaboral nel Principáu.

Esti comportamientu compruébase al comparar les cifres de la encuesta coles medies trimestrales de paru rexistráu y afiliación a la Seguridá Social. Asina, mientres les primeres reflexen una reducción trimestral del desempléu del 6,8 %, les segundes alcen esti porcentaxe hasta'l 7,45 %. Amás, los datos d'afiliación de los trés meses últimos indiquen qu'aumentó en 6.343 persones (un 1,76 %), mentes que la EPA envalora un descensu de 700 persones (0,18 %).

Asina mesmo, na comparancia interanual el paru rexistráu mengua en 3.234 persones (-4,41 %), de la que la EPA calcula una medría de 4.000 (+6,76 %).

La directora del Serviciu Públicu d'Empléu del Principáu (Sepepa), Luisa Pérez, insistió güei en que los datos de la EPA en comunidaes autónomes uniprovinciales causen fluctuaciones trimestrales intenses pol tamañu amenorgáu de la muestra, polo qu'aconseyó comparar les cifres en medies anuales.

“Dende'l Gobiernu del Principáu vamos siguir empeñaos n'ameyorar la empleabilidá de los trabayadores, afaciendo les sos competencies a les necesidaes de les empreses pa favorecer el descensu del paru y la medría de la ocupación”, sorrayó Pérez.

 

Información sobre el documento

© Copyright 2006. Gobiernu del Principau d'Asturies