Gobiernu del Principau d'Asturies

Asturies, muncho más cerca

Tas en

Asturias.es Gobiernu Actualidá El pabellón del Principáu na Fidma acueye una muestra que ...
 

Actualidá

El pabellón del Principáu na Fidma acueye una muestra que reivindica’l protagonismu asturianu nel aniciu de la ruta xacobea

- La esposición El Camín que nació n’Asturies percuerre tolos trazaos enmarcándolos nel contestu européu y apurriendo testimonios históricos significativos

01/08/2019

- L’estand incluye documentación gráfico y audiovisual, pantalles interactives y un llaberintu lúdicu pa divulgar los trés itinerarios que pasen pela comunidá

El pabellón del Gobiernu del Principáu na Feria Internacional de Muestres d’Asturies (Fidma) va reivindicar anguaño’l protagonismu asturianu nel orixe del Camín de Santiago con una esposición espectacular que percuerre con rigor y vocación divulgativa los itinerarios xacobeos na comunidá.

La muestra El camín que nació n’Asturies destaca’l papel que la conformación de la ruta xacobea desempeñó na historia, la cultura, la relixón y la sociedá europea d’hai 1.200 años. Tamién incide especialmente nel papel tan relevante que tuvo la comunidá na so creación neses primeres décades del sieglu IX.

El trabayu espositivu céntrase en dar a conocer los trazaos xacobeos principales al so pasu pel Principáu y enmarcalos nel contestu européu, amás d’ufiertar testimonios significativos de pelegrinos del pasáu y de les buelgues que dexaron en sitios emblemáticos del Camín.

La esposición repártese en cuatro zones que, al traviés d’un trazáu circular, percuerren les trés rutes asturianes del Camín de Santiago (primitivu, costeru y del Salvador) de manera didáctica con una partida d’elementos lúdicos.

Asina, de la planta baxa del espaciu espositivu parte un llaberintu lúdicu onde s’afayen munches curiosidaes como, por exemplu, cuála ye la ruta más popular, quién foi la primer pelegrina o cuándo se celebren los años xacobeos. Nuna de les zones más espectaculares del estand, marcada por una gran imaxe del rei Alfonso II empezando’l Camín, los visitantes van poder conocer los detalles del orixe de la ruta n’Asturies y les característiques de los trés trazaos, amás de la so historia n’Europa.

La muestra tamién fai referencia al Añu Santu que vien, que se va celebrar nel 2021, y esboza los proyectos nos que trabayen yá delles entidaes y instituciones pa encarar la celebración y promocionar, difundir y crear productos nuevos vinculaos a la ruta, que sigue n’innovación constante.

La exhibición complétase cola muestra fotográfica Los valores del Camín, dexada por Correos, y dellos audiovisuales y pantalles interactives. Na so aguada más lúdica, incorpora un gran photocall onde los visitantes van poder retratase vistíos col equipu del pelegrín énte una gran semeya de la ruta xacobea de la que pasa per Caravia.

Amás, el pabellón va tener como soníu ambiente un repertoriu d’efectos recoyíos pol artista Juanjo Palacios nes reserves de la biosfera d’Asturies, amás d’una selección de cantu gregorianu grabáu poles monxes benedictines del monesteriu uviedín de San Pelayo.



Presentaciones nel pabellón

El pabellón del Principáu va acoyer tamién una partida de presentaciones nesta edición de la Fidma, que va abrise al públicu dende’l sábadu y hasta’l día 18. Trátase d’estes:

   - Martes 6 d’agostu. 12 hores. Camín de Santiago del Futuru by EER. Trátase d’un pelegrinaxe tecnolóxicu de la mano d’empreses asturianes moces que desenvuelven proyectos alredor de la ruta xacobea.
   - Miércoles 7 d’agostu. 13 hores. El Camín del reciclaxe, al cargu de Coxersa y Ecoembes.
   - Vienres 9 d’agostu. 12 hores. El Camín de Santiago con Correos.
   - Miércoles 14 d’agostu. 12 hores. El llabor de les asociaciones d’amigos del Camín de Santiago y necesidaes de meyora dende l’actualidá hasta’l 2021, al cargu de Laureano García, coordinador de les asociaciones asturianes y de les del norte d’España, y de María Regla Rico, portavoz de les asociaciones costeres na Comisión del Camín de Santiago d’Asturies.

 

Información sobre el documento

© Copyright 2006. Gobiernu del Principau d'Asturies