Gobiernu del Principau d'Asturies

Asturies, muncho más cerca

Tas en

Asturias.es Temes Agricultura y montes Alimentos del Paraíso multiplica por cuatro el númberu de ...
 

Agricultura y montes

Alimentos del Paraíso multiplica por cuatro el númberu de productores y ellaboradores inscritos en modificando’l so reglamentu

La midida supunxo la incorporación de 232 nuevos operadores. La marca distingue l’orixe xeográficu y certifica la calidá de los productos agroalimentarios

09/05/2020

El cambéu del reglamentu d'Alimentos del Paraísu permitió multiplicar por cuatro'l númberu d'operadores (productores y ellaboradores) inscritos nesta marca de calidá . La midida contribuyó asina a fortalecela y facela más útil pal crecimiento del sector agroalimentariu, yá que dexa identificar y singularizar les producciones al ufiertar alimentos con un valor añedíu mayor que reconoz les sos calidaes, el so valor ecolóxicu, la ellaboración artesanal o l'empléu de materia prima local.

Esti cambéu, publicáu'l pasáu 28 d'abril nel Boletín Oficial del Principáu d'Asturies (Bopa), permite que los ellaboradores de denominaciones d'Orixe Protexida (DOP) ya Indicación Xeográfica Protexía (IGP) puedan llograr de manera automática l'autorización pal usu de la marca. Esto implicó que se pase de 87 operadores inscritos a 319, lo que supón la incorporación de 232.

La marca de calidá Alimentos del Paraísu estrema nel mercáu productos agroalimentarios qu'axunten unes determinaes condiciones y cumplen unos requisitos específicos, que van dende la materia prima y el procesu d'ellaboración hasta’l resultáu final, de manera que garanticen el so orixe xeográficu y la so calidá certificada. Toma tanto productos frescos como ellaboraos que superaren tolos controles esixíos pola Alministración rexonal.

Los operadores inscritos tomen una amplia variedá de productos qu'inclúi DOP, IGP, agricultura ecolóxica y otres ellaboraciones de calidá y marques de garantía. Col nuevu reglamentu, los ellaboradores inscritos n'Alimentos del Paraísu de DOP y IGP asítiense en 248 y los de producción ecolóxica en 22. A estos hai que sumar 49 d'otros productos como arándanos, quivi, marañueles de Lluanco y Candas, chorizu, compangu y morciella, miel, verdines, quesos artesanos, quesu azul, arroz con lleche, ellaboraos cárnicos y güevos camperos.

Amás, el cambéu nel reglamentu d'Alimentos del Paraísu tamién dexa utilizar el distintivu a los establecimientos que comercialicen productos amparaos polos operadores inscritos, previa autorización espresa de la Dirección Xeneral de Desenvolvimientu Rural ya Industries Agraries. La midida supón favorez l'usu de la marca pol pequeñu comerciu, al traviés d'internet y la distribución, y de manera progresiva tamién se va dir faciendo estensivu'l so usu a la hostelería y turismu de la rexón venceyada a Asturies Paraísu Natural.

El Gobiernu de Principáu sigue trabayando pa incorporar a más productores y ellaboradores y na redacción de nuevos pliegos de productu que permitan al sector primariu y agroalimentariu asturianu siguir creciendo y xenerar mayor valor añedíu.

Información sobre el documento

© Copyright 2006. Gobiernu del Principau d'Asturies