Gobiernu del Principau d'Asturies

Asturies, muncho más cerca

Tas en

Asturias.es El paru rexistráu redúxose en 2.480 persones nel añu últimu y ...
 

Aniciu

El paru rexistráu redúxose en 2.480 persones nel añu últimu y asítiase na cifra más baxa nun mes de payares dende’l 2008

Asturies foi la cuarta comunidá autónoma con mayor retrocesu interanual del númberu de desocupaos, el -3,38 %, unos dos puntos percima del promediu nacional. L'afiliación media a la Seguridá Social aumenta en 4. 562 cotizantes nos dolce meses postreros. El desempléu xube en payares en 815 persones pol fin de contratos na hostelería, en llinia cola evolución d'esi mes mientres los diez años últimos

03/12/2019

El númberu de persones en paru rexistráu nes oficines del Serviciu Públicu d'Empléu del Principáu d'Asturies (Sepepa) baxó en 2.480 nos dolce meses últimos, un ritmu de descensu interanual del - 3,38 %.

Al rematar payares contabilizáronse 70.877 paraos n'Asturies, la cantidá más baxa pa esi mes dende l'añu 2008. Destaca, nesti sentíu, que'l Principáu foi la cuarta comunidá autónoma con mayor retrocesu nes cifres interanuales de persones desocupaes, cuasi dos puntos porcentuales percima del promediu nacional.

Esta evolución tuvo la so traducción na afiliación a la Seguridá Social, de manera tal que'l númberu de cotizantes creció en 4.562 persones nos dolce meses últimos, con una crecedera porcentual del 1,2 % hasta asitiar en 368.160 persones al términu del mes pasáu.

Pilar Varela, directora xerente del Sepepa, destaca qu'Asturies, dempués del País Vascu, Castiella y Llión y Murcia, foi la cuarta comunidá autónoma con meyor evolución del paru interanual, “lo que supón que'l Principáu encadena seis años consecutivos de cayíes nesti indicador, un datu ensin dulda bien positivu”.

Tocante a la evolución del paru mensual, al rematar payares contabilizáronse 815 paraos más que n'ochobre (+1,16 %), un aumentu en llinia col d'exercicios anteriores. Los aumentos concéntrense en tolos sectores d'actividá sacante nos demandantes de primer empléu, con mayor incidencia nes actividaes d'hostelería, na industria d'alimentación y bevíes y en dellos sectores industriales.

El desempléu masculín contabiliza 30.494 persones al xubir en 515 (+1,72 %) y el femenín en 40.383, al incrementase en 300 (0,75 %) al respective del mes d'ochobre. Por edaes, el paru xubió en tolos tramos y por conceyos les mayores crecederes correspondieron a los conceyos con mayor actividá nel sector hostelero y hoteleru: Cangues d'Onís (15,03); Llanes (11,09 %); Onís (24,14 %); Ribeseya (15,48 %). Ente los conceyos de mayor población, la evolución foi la siguiente: Uviéu (0,12 %); Xixón (0,58 %); Avilés (0,87 %); Siero (0,48 %).

   Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies