Gobiernu del Principau d'Asturies

Asturies, muncho más cerca

Tas en

Asturias.es El Gobiernu d'Asturies habilita'l teletrabayu pa más de 11.000 ...
 

Aniciu

El Gobiernu d'Asturies habilita'l teletrabayu pa más de 11.000 emplegaos públicos de tolos ámbitos de l'Alministración

Otros 8. 000 profesionales del Serviciu de Salú van empezar a tener accesu remotu a los sos puestos nes hores próximes. La Conseyería de Presidencia destaca'l bon funcionamientu del Principáu pa ufiertar el meyor serviciu a la ciudadanía nes dificultaes qu'implica l'estáu d'alarma

Persona teletrabajando

25/03/2020

Más de 11.000 trabayadores del Principáu cubren la xornada llaboral dende les sos cases mediante distintes modalidaes d'accesu a les aplicaciones corporatives, al envís de caltener l'actividá esencial básica nos servicios públicos mientres l'estáu d'alarma.

Los más de los puestos, daqué más de 4.500, habilitáronse nel Serviciu de Salú (Sespa), na Alministración xeneral (4.200) y en Xusticia (1.600), mentes que los restantes enmárquense en diversos entes y organismos públicos.

Desque se decretó'l confinamientu, el Gobiernu d'Asturies habilitó a cuasi 10.000 usuarios esternos p’acceder al puestu de trabayu en remotu y a otros 1.000 para desempeñar el so llabor na Alministración de forma remota. Al personal restante dióse-y accesu a les aplicaciones de trabayu collaborativu y videoconferencia.

Amás, 11.000 docentes de la Conseyería d'Educación cunten con accesu a l'aplicación Office 365, que contién les ferramientes necesaries pa facilitar l'aprendimientu del alumnáu a distancia.

Asina mesmo, otros 8.000 profesionales del Sespa van poder acceder al so puestu de trabayu cuando se complete una midida nueva que va ponese en marcha nes hores próximes.

Estos datos diéronse a conocer na xunta que caltuvo güei la conseyera de Presidencia, Rita Camblor, con parte del so equipu pa revisar el funcionamientu del teletrabayu na Alministración autonómica.

Comprobóse también que los trabayadores con servicios esenciales asignaos tán cumpliendo con normalidá les sos responsabilidaes. En dellos momentos, la conectividá en periodos d’actividá máxima foi asemeyada a un día de trabayu previu a la declaración d'alerta.



Cursos de teleformación

Per otra parte, l'Institutu d'Alministración Pública Adolfo Posada ta impartiendo 70 cursos de teleformación y 5 más, tamién nesta modalidá, pal personal sociosanitario. Nesti últimu casu, va flexibilizase'l plazu de finalización si los usuarios asina lu riquen.

El mes próximu van empezar 32 cursos de la Escuela de Seguridá Pública del Principáu y hai disponibles otros 150 d’autoformación n'abierto na páxina web del institutu.

Dende la Conseyería de Presidencia valórase'l funcionamientu de l'Alministración autonómica pa siguir ufiertando'l meyor serviciu posible a la ciudadanía, a pesar de la complicada situación qu'implica l'estáu d'alarma. L'esfuerciu de los emplegaos públicos pa cubrir los servicios esenciales y atender les necesidaes básiques de la población resulta bien pervalible nestes circunstancies.

Asina mesmo, destaca'l compromisu de la plantiya de los departamentos de sanidá y servicios sociales, que tán llogrando que tanto en centros de persones mayores o con discapacidá como nos de menores y, polo xeneral, nos servicios d'asistencia, tea llográndose con facilidá'l reemplazu por baxes llaborales.

Hasta agora, n’ámbitu de l'Alministración xeneral son bien escasos los positivos por COVID-19 y en tolos casos actúase conforme a los protocolos que marquen les autoridaes sanitaries: aislamientu pa los contactos estrechos y desinfección y llimpieza nos edificios afectaos. Reforciáronse también les midíes de seguridá que recueye'l procedimientu específicu de prevención de riesgos llaborales pal control de centros del Principáu.

La Conseyería de Presidencia estima la collaboración y unvia un mensaxe de tranquilidá a quien tienen d'asistir a los sos puestos de trabayu nestos díes, nos que ye necesaria la serenidá y compromisu de tola ciudadanía.

Información sobre el documento

© Copyright 2006. Gobiernu del Principau d'Asturies