Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies constituye’l Conseyu de Protección Civil, ...
 

Aniciu

El Gobiernu d’Asturies constituye’l Conseyu de Protección Civil, l’órganu de coordinación de les polítiques públiques en materia d’emerxencies

- Va funcionar con un plenariu de 20 miembros qu’incorpora organizaciones sindicales y asociaciones empresariales

13/02/2018

     - El conseyeru de Presidencia valora’l carácter plural del organismu, que va asumir los llabores de fomentu del voluntariáu y la emisión d’informes sobre seguranza
     - Los miembros del conseyu alcordaron güei la creación del grupu de trabayu de quemes forestales

El Gobiernu d’Asturies celebró güei la primer xunta del Conseyu de Protección Civil del Principáu, l’órganu nuevu de coordinación de les polítiques públiques en materia d’emerxencies.

El Conseyu de Protección Civil ye l’organismu colexáu de calter consultivu, de participación y cooperación de les alministraciones con competencies nesti ámbitu. Asume les funciones que desempeñaba l’antigua Comisión de Protección Civil, como la d’informar sobre los planes territoriales y especiales y establecer criterios de cooperación, amás d’otres nueves rellacionaes colos principios d’eficacia, coherencia y coordinación nes actuaciones. Nesti sentíu, va encargase d’homoxeneizar los llabores de formación en protección civil y estinción de quemes, va fomentar el voluntariáu y va tener capacidá pa emitir informes en materia de seguranza.

Tocante a la so organización, va operar con un plenariu de 20 miembros, frente a la Comisión de Protección Civil, que cuntaba con plenu y comisión permanente. En concreto, va haber cinco representantes del Gobiernu del Principáu, otros cinco de la Federación Asturiana de Conceyos (FACC), ún del Serviciu d’Emerxencies del Principáu (Sepa), trés de l’Alministración Xeneral del Estáu, dos de la Federación Asturiana d’Empresarios (Fade) y dos d’organizaciones sindicales.

El conseyeru de Presidencia y Participación Ciudadana, Guillermo Martínez, que presidió la sesión constitutiva del conseyu, aseguró que se trata d’un organismu “más plural y diversu”, que va dexar desenvolver de manera efectiva’l derechu de los ciudadanos a participar na ellaboración de normes y planes de protección civil.

El Conseyu de Gobiernu aprobó’l 4 d’ochobre’l decretu pol que se regula la organización, composición y funcionamientu d’esti órganu, un trámite que daba continuidá al alcuerdu de l’antigua Comisión de Protección Civil pa la so tresformación en conseyu.

El cambéu enmárcase nos alcuerdos adoptaos en xineru del 2017 na Conferencia de Presidentes, na que s’alcordó entainar na aplicación de la Llei 17/2015, de 9 de xunetu, del Sistema Nacional de Protección Civil. La norma establez, ente otres prioridaes, l’impulsu a la coordinación ente instituciones p’ameyorar procedimientos y ganar n’eficacia énte les emerxencies.

 

Grupu de trabayu de quemes forestales

Otra manera, nel Conseyu de Protección Civil alcordóse güei la creación del grupu de trabayu de quemes forestales, que va tener funciones de calter consultivu y participación. Asina, va informar sobre los proyectos de reglamentu y les normes que regulen actividaes que xeneren riesgos de quema y afecten a los servicios d’intervención. Amás, va establecer criterios de coordinación ente toles organizaciones de prevención, investigación y estinción de fueos.

El grupu va tar formáu por 16 persones en representación del Gobiernu d’Asturies, el Sepa, la Universidá d’Uviéu, la Fade, les cooperatives forestales, l’asociación de propietarios forestales, les organizaciones sindicales y ecoloxistes, les agrupaciones municipales de voluntarios de protección civil, les compañíes aseguradores y les empreses y organismos que cunten con servicios propios d’estinción.

 

 

Información sobre el documento

© Copyright 2006. Gobiernu del Principau d'Asturies