Gobiernu del Principau d'Asturies

Asturies, muncho más cerca

Tas en

Asturias.es Families El Principáu entrega los Premios Carné Xoven 2019 a una firma de ...
 

Families

El Principáu entrega los Premios Carné Xoven 2019 a una firma de moda infantil y un programa pa families con menores con discapacidá

Cristina Santamarina, empresaria de Le petit Popelin recibe’l reconocimientu na categoría d’Entamadores Mozos, dotáu con 1. 500 euros. La distinción a la Solidaridá recái n’Alba Romero, que creó Alienta cola mira de promover l’alcuentru ente familiares de persones con necesidaes especiales na zona oriental

Alba Romero, impulsora de la Asociación Alienta; la directora del Instituto Asturiano de la Juventud, Clara Sierra, y Cristina Santamarina, empresaria de Le petit Popelin

17/10/2019

El Principáu dio güei los Premios Carné Mozu 2019 a Cristina Santamarina, titular de la empresa de moda infantil Le Petit Popelin, y a Alba Romero, impulsora del proyectu Alienta, dirixíu a families con menores con discapacidá o necesidaes educatives especiales de la zona oriental.

La firma asturiana Le Petit Popelin, que recibió’l gallardón na categoría Entamadores Mozos, ye un proyectu qu’apuesta pola esclusividá, la calidá y la distinción na ropa de neños pequeños texío a mano con material de primer calidá. La marca fai posible la personalización de prendes, de manera que’l veceru escueye diseñu, color y talla pa la so confección posterior. Na actualidá, namás se viende al traviés d’internet y distribúyese per toa España.

Esta categoría del premiu tien una dotación de 1.500 euros y el so oxetivu ye sofitar y reconocer l’espíritu entamador de titulares del Carné Mozu que tienen una empresa en cualquier sector d’ente ún y trés años d’antigüedá.

Alba Romero, gallardonada na modalidá de Solidaridá, punxo en marcha la iniciativa Alienta cola mira de promover l’alcuentru ente familiares de menores con discapacidá, amás de pa informar, guiar y asesorar sobre los recursos disponibles y analizar les sos necesidaes y demandes. Esti premiu ta dotáu con 800 euros y concédese al titular de un Carné Mozu que realizare una acción solidaria ente’l 1 de xineru y el 12 de setiembre del 2019.

La directora del Institutu Asturianu de la Mocedá, Clara Sierra, entregó güei estos gallardones, que se fallen pel tercer añu siguíu dientro del Programa Carné Mozu del Principáu.



Sobre’l Carné Mozu d’Asturies

El Carné Mozu ye un programa que xestiona l’Institutu Asturianu de la Mocedá, organismu perteneciente a la Conseyería de Presidencia. Trátase d’una iniciativa que funciona nos 35 países europeos adheríos que se pue usar en toos esos territorios. Esta tarxeta dexa consiguir descuentos d’empreses y instituciones collaboradores en tresporte, viaxes, agospedamientu, visites a museos, cines, conciertos, academies d’estudiu y formación, autoescueles, turismu activu, actividaes y equipamientu deportivu, ropa, calzáu, salú y estética, etcétera.

Pa sacar el Carné Mozu del Principáu hai que tener ente 12 y 30 años y tien validez hasta los 31. Cuesta 10 euros y tien incorporáu un seguru gratuitu d’asistencia en viaxe.

Información sobre el documento

© Copyright 2006. Gobiernu del Principau d'Asturies