Gobiernu del Principau d'Asturies

Asturies, muncho más cerca

Tas en

Asturias.es El Gobiernu d’Asturies destina 776.000 euros a la rehabilitación ...
 

Aniciu

El Gobiernu d’Asturies destina 776.000 euros a la rehabilitación de 48 viviendes en Grandas y Pezós

Les obres formen parte del programa d’Árees de Rexeneración y Renovación Urbana (ARRU), que pilota la Conseyería de Derechos Sociales y Bienestar. La convocatoria d’ayudes d’anguaño, con un presupuestu inicial de 815. 000 euros, va publicase nos díes vinientes

11/02/2020

El director xeneral de Vivienda, Fermín Bravo, visitó esta mañana les obres de rehabilitación de 48 viviendes nos conceyos de Grandas de Salime y Pezós, con una inversión total de 776.000 euros. Estos trabayos executáronse dientro del programa de fomentu de les Árees de Rexeneración y Renovación Urbana (ARRU), financiáu al traviés del Plan de Vivienda de la Conseyería de Derechos Sociales y Bienestar.

L’actuación en Grandas de Salime xubió a 530.544 euros, lo que dexó reparar 33 viviendes. En Pezós, dedicáronse 245.400 euros a la meyora d’otros 15 inmuebles.

El director xeneral de Vivienda, que visitó esta mañana les obres colos alcaldes de Grandas de Salime y Pezós, Eustaquio Revilla y José Valledor, destacó la importancia d’estes iniciatives, “cola collaboración de los particulares, que fomenten el caltenimientu de los conceyos pequeños y ayuden a ameyorar les condiciones de vida de los sos habitantes de la que favorecen l’actividá económica, porque los trabayos fáenlos principalmente empreses de la zona”. Amás, sorrayó que “una inversión de 775.950 euros nuna zona con menos de 1.000 habitantes supón un apueste firme pol mediu rural, pol bienestar de los sos habitantes y pola fixación de población”.



Convocatoria del 2020

Fermín Bravo tamién anunció que la convocatoria del programa ARRU d’anguaño va publicase nel Boletín Oficial del Principáu d’Asturies (Bopa) nos díes vinientes y va cuntar con un presupuestu inicial de 815.000 euros. Estes convocatories englóbense nel conveniu firmáu col Ministeriu de Fomentu pa la execución del Plan Estatal de Vivienda 2018-2021.

Les obres de los ARRU engloben un sistema d’optimización d’eficiencia enerxética nes cases, lo que supón una rebaxa de les factures de los suministros y un mayor confort nes viviendes, amás d’una renovación de la redolada y la eliminación de les barreres arquitectóniques nel accesu a los edificios.

Información sobre el documento

© Copyright 2006. Gobiernu del Principau d'Asturies