Gobierno del Principado de Asturias

Asturias, mucho más cerca

Estás en

Aniciu El Principáu ameyora la seguridá de les víes AS-117 y AS-19, nes ...
 

Aniciu

El Principáu ameyora la seguridá de les víes AS-117 y AS-19, nes que l'Asociación Española de la Carretera detecta tramos de concentración d'accidentes

Los trabayos de la vía que xune Riañu y Tarna cunten con un presupuestu de llicitación de 1,5 millones. La Conseyería d'Infraestructures va redactar un proyectu pa tresformar nuna glorieta la intersección actual del polígonu de Falmuria, en Carreño

16/07/2017

La Conseyería d'Infraestructures, Ordenación del Territoriu y Mediu Ambiente impulsa obres p'ameyorar la seguridá de l’AS-117 y l'AS-19, les dos víes de la rede autonómica nes que l'Asociación Española de la Carretera detectó tramos de peligrosidá elevada.

Nel primer de los casos, la carretera que xune Riañu col puertu de Tarna, van executase trabayos presupuestaos en 1.499.055 euros que van tar remataos en siete meses dende la so axudicación. Nesta vía identificáronse dos tramos de concentración d'accidentes, dambos asitiaos ente la ponte atirantada de Sama y l'enllaz de Ciañu, en Llangréu.

Pa iguar los problemes descritos proyectóse, per un llau, la renovación del pavimentu ente puntos quilométricos 7+700 y 19+700, que va realizase mediante la estensión de dos capes de microaglomerao, previu saniamientu y regularización onde sía menester. Per otra parte, analizáronse tolos aspectos qu'influyen sobre los niveles de riesgu nel tráficu y proyectáronse delles actuaciones p'ameyorar la seguridá vial, tales como la reposición de la señalización horizontal nos tramos onde se realiza la meyora del firme, la reposición de señales verticales deterioraes y la instalación de cartelos de tramu de concentración d'accidentes en cada sentíu de la circulación.

Nos túneles de Sotrondio van reponese dellos indicadores pa reforciar la percepción del borde de la calzada y dellos tramos de barrera de seguridá. Los trabayos tamién incluyen la sustitución y pintáu de delles partes de la barandiella metálica na ponte asitiada a la salida de Sama de Llangréu, que la so pasarela piatonal va anovar el pavimentu y la señalización.

 

Intervención nel AS-19

No que fai a l'AS-19 (Xixón-Avilés), el Principáu yá actuó nel 2015 nel tramu que va ente la glorieta de Tabaza y Avilés, lo que contribuyó a que nun se rexistraren accidentes graves nin l'añu pasáu nin lo que va d'este. Primeramente, tamién s'intervieno na baxada hasta la glorieta de Tabaza, onde s'habilitó un carril lentu pa vehículos pesaos y llimitóse a 70 quilómetros per hora la velocidá aconseyable.

D’equí a poco, la Dirección Xeneral d'Infraestructures y Tresportes va actuar tamién nel tramu que percuerre los quilómetros 3,9 a 6,1 de la vía, con un proyectu pa tresformar nuna glorieta la intersección actual del polígonu de Falmuria, colo que van evistase accidentes por algame. Amás, va rebaxase la velocidá en tol tramu.

Ye menester recordar que nesta vía esiste un cuartu y últimu tramu, ente l'enllaz de Llorea y El Empalme (A-8), que foi tresferíu al Ministeriu de Fomentu y ye competencia, por tanto, de l'Alministración del Estáu.

Información sobre el documento

© Copyright 2006. Gobierno del Principado de Asturias