Gobiernu del Principau d'Asturies

Asturies, muncho más cerca

Tas en

Asturias.es Temes Educación Les escueles asturianes recuperen les clases presenciales con ...
 

Educación

Les escueles asturianes recuperen les clases presenciales con 511 unidaes covid y más de 530 docentes de refuerzu n’Infantil y Primaria

Los centros ponen en marcha los protocolos con entraes escalonaes, circuitos dientro de les instalaciones y ratios máximes de 20 escolares per aula. El cursu va entamar el martes con 63. 929 estudiantes nestes dos etapes, lo que supón una perda de 1.648 matrícules respecto al añu pasáu

19/09/2020

Los colexos asturianos recuperen el martes qu’entra, 22 de setiembre, les clases presenciales col entamu del cursu lectivu 2020-2021 n'Infantil y Primaria. L'enfotu del Gobiernu d'Asturies por garantizar un regresu a les aules lo más seguru posible, en plena pandemia, traducióse nel amenorgamientu de la ratio a 20 estudiantes per aula en dambes etapes. Esti descensu supunxo la creación de 511 aules covid y la contratación de más de 530 docentes na rede pública y l'enseñanza concertada.

En concreto, la Conseyería d'Educación autorizó un total de 295 nueves aules na escuela pública y otres 216 en colexos concertaos, para cumplir con esa ratio n'Infantil y Primaria. La dotación de personal necesaria p’atender estes unidaes supunxo la contratación de 310 docentes na escuela pública, más de 200 na concertada y 12 nos centros d'educación especial (CEE). El compromisu del Principáu ye llegar a los 860 docentes de refuerzu col entamu del cursu en Secundaria, Bachilleratu y Formación Profesional (FP).

Los equipos directivos tienen preparaos los protocolos colos que van acoyer al alumnáu'l martes, ellaboraos acordies con un plan d'actuación de la Conseyería d'Educación visáu por Salú. Esos documentos recueyen les entraes y salíes escalonaes en función de los cursos, la organización de grupos estables, el diseñu d’itinerarios dientro de los recintos y la so señalización pa limitar el contactu ente aules y la medría de la llimpieza. L'Alministración tamién facilitó otros protocolos pa servicios complementarios como'l tresporte o les actividaes extraescolares.

Per otra parte, el profesoráu que foi designáu coordinador covid en caún de los centros yá ta celebrando sesiones de trabayu cola Conseyería de Salú.



La matrícula

El cursu escolar 2020-2021 empieza n'Asturies con 63.929 estudiantes n'Infantil y Primaria, de los que’l 71,4% van a la escuela pública. La baxa natalidá del Principáu traduzse nuna perda global de 1.648 matrícules respecto al añu anterior.

En total, los centros públicos cunten con 32.510 alumnos y alumnes d'Educación Primaria y 13.145 del segundu ciclu d'Infantil, que toma dende los 3 hasta los 6 años. La rede privada-concertada tien 12.729 matriculaos en Primaria y 5.545 nel segundu ciclu d'Infantil.

Los datos de matriculación del alumnáu queden de la siguiente manera:

Enseñanza Etapa Cursu 2019/2020 Cursu 2020/2021 Diferencia total %
Publica 2º Ciclo Infantil 13.519 13.145 -374 -2,7
Primaria 33.424 32.510 -914 -2,7
Privada/Concertada 2º Ciclo Infantil 5.639 5.545 -94 -1,6
Primaria 12.995 12.729 -266 -2,0
Total 65.577 63.929 -1.648 -2,5

 



El cursu escolar 2020-2021 n'Asturies:

• La ratio rebaxóse a 20 alumnos per aula.

• Los centros garanticen la distancia de seguridá de 1,5 metros.

• El Gobiernu asturianu va invertir más de 40 millones d'euros estra nel sistema educativu.

• Les aules covid van implicar la contratación de 860 docentes.

• Los servicios de llimpieza y desinfección nos centros reforzáronse col esfuerzu de los conceyos.

• Educación multiplica la ufierta para la formación dixital del profesoráu.

• La conseyería tuvo xuntes preparatories con tolos equipos directivos, de manera presencial y telemática


Icono gráfico alusivo al tipo de archivo Audiu (Audiu: 1 Mb) (n'español)

Información sobre el documento

© Copyright 2006. Gobiernu del Principau d'Asturies